Memleket basshysy qol qoıǵan arnaýly zańnan keıin memlekettik satyp alý júıesindegi jumys jeńildetilip, saladaǵy áreket ashyq ári qoljetimdi bola tústi.
- Elbasy Nursultan Nazarbaevtyń «Úshinshi jańǵyrý: jahandyq básekege qabilettilik» atty Joldaýynda memlekettik satyp alýdy jetildirý talabyn qoıǵan edi. Osy baǵytta birneshe jumys atqarylyp, jyldyń sońynda zańǵa ózgerister endi. Sonyń biri: baǵa usynystaryn suratý tásilimen satyp alýlarda, ıaǵnı satyp alýlarda 1 000 AEK deıin nemese 2 525 000 teńgege deıin tapsyrys berýshilerge qujattamada taýarlardyń fırmalyq ataýlaryn kórsetýge quqyq beriledi. Bul tapsyrys berýshilerge neǵurlym sapaly taýarlardy satyp alýǵa múmkindik beredi, - deıdi Almaty oblysy boıynsha Ishki memlekettik aýdıt departamenti basshysynyń orynbasary Ramanhan Tóregeldıev.
Jańa erejede tapsyrysty bir kózden alý tásilimen júrgizetin jumystar men qyzmetterdi satyp alýdyń shekti somasy 100-den 500 AEK-ke deıin ulǵaıtylǵan eken. Bul jeke kásipkerlerdiń jumysyn aıtarlyqtaı jeńildetip otyr. Sondaı-aq, shaǵyn jáne orta bıznes úshin satyp alý portalyndaǵy ashyqtyq qamtamasyz etilip, tapsyrys berýshi memlekettik organdar úshin jaýapkershilik kúsheıgen.
- Memlekettik satyp alýdyń jyldyq josparyn veb-portalda ornalastyrmaǵany nemese ýaqytyly ornalastyrmaǵany, memlekettik satyp alýdyń jyldyq josparyn bıýdjetke sáıkes kelmeıtin kólemde bekitkeni, birinshi basshylardyń, sonymen qatar komıssııa músheleriniń áleýetti ónim berýshilerdiń ótinimderin ýaqytyly qaramaǵany jáne aldyn ala ruqsat berý hattamasy men qorytyndy hattamasyn ýaqytyly ornalastyrmaǵany úshin ákimshilik jaýapkershilikter qarastyrylǵan, - deıdi bul týraly R.Tóregeldıev.
Aıtpaqshy, osy jyldan bastap áleýetti ónim berýshilerge memlekettik satyp alýda, veb-portalyn paıdalaný boıynsha qyzmet aqyly negizde kórsetiledi. Bul qyzmettiń quny men tarıfi memlekettik satyp alý veb-portalynda ornalastyrylǵan.
Qalmahanbet MUQAMETQALI,
«Egemen Qazaqstan»
Almaty oblysy
