2018 jyldyń ekinshi toqsanynan bastap, memlekettik nómirlerge G, I, J, Q áripteri jańadan engizilip, aqyly negizde satyla bastaǵany belgili. Jyl qorytyndysy boıynsha nómir satýdan túsken qarjy kólemi 4 mıllıard teńgeni quraǵan.
Aıta keterligi, ótken jyldyń basynda elimizde adam atynyń alǵashqy áripteri jazylǵan kólik nómirleri de satylymǵa shyqqan bolatyn. Onda árkim áripterdi ózi qalaǵan kúıinde jazdyra alady. Biraq onyń ózindik quny da bar. Máselen, 010, 020, 030 degen nómirler shamamen 138 myń teńge turady. Al oǵan qalaǵan áripterdi qossańyz, 276 myń teńgeden asyp jyǵylady.
Qazaqstandyq avtobıznes qaýymdastyǵy taratqan aqparatqa sáıkes, byltyr ákimshilik polısııa organdarynda barlyq úlgidegi, onyń ishinde qaıta resimdeýden ótken, avtomobıl aýystyrǵan 1,2 mln kólik quralyn tirkedi. Bul kórsetkish aldyńǵy jylmen salystyrǵanda 14,8 paıyzǵa joǵary.
2018 jyldyń basynan beri tirkeýge turǵan kólik sany aı saıyn 7,5 paıyzǵa artyp otyrǵan. Tirkelgen kólik sanynyń kólemi boıynsha óńirler men iri qalalarǵa toqtalar bolsaq, Túrkistan oblysy boıynsha – 173 925 avtokólik, Almaty oblysynda – 173 453, Almaty qalasynda – 151 030, Astana qalasynda – 101 431, Qaraǵandy oblysynda – 81 967, Shyǵys Qazaqstan oblysynda 73 130 avtokólik tirkelipti.
Atalǵan qaýymdastyq júrgizgen saraptama nátıjeleri boıynsha elimizdegi avtoparkterdiń «qartaıǵany» anyqtalyp otyr. 2018 jyldyń bas kezindegi jaǵdaı boıynsha jańadan tirkelgen kólikterdiń 790 171-iniń zaýyttan shyqqanyna 10 jyldan asqan. 20 jyldan artyq júrgen mashınalar sany − 464 236. 10-20 jyl aralyǵynda júrgen kólikter sany – 325 935 birlik. Al 3-10 jyl aralyǵyndaǵy tehnıka sany – 290 205, 3 jyl tolmaǵan kólikterdiń qatary – 112 833.
Erkejan AITQAZY,
«Egemen Qazaqstan»
