Dárigerge qaralý úshin tirkeý bóliminen bastalatyn qaǵazbastylyq kisini ábden mezi etip jiberetini talaı qozǵalǵan másele. Bul jaıynda Memleket basshysy Nursultan Nazarbaev dáriger men muǵalim qaǵaz toltyrýmen emes, shákirtine bilim berýmen, aldyna kelgen pasıentin emdeýmen aınalysýy tıis dep sıfrly júıege kóshýge arnaıy tapsyrma berdi. Elbasy tapsyrmasyn júzege asyrý aıasynda byltyr jyl basynda densaýlyq saqtaý salasyn sıfrlandyrý maqsatynda 4 oblysta qanatqaqty joba qolǵa alyndy. Joba barysynda em alýshylardy tekserýden ótkizý men emdeý nátıjeleri, sozylmaly aýrýlary, dárilik zattarǵa allergııalyq reaksııasy, tamaqtaný, dıeta jáne taǵy basqa dárigerdiń usynystary týraly málimetterdi biriktiretin elektrondy densaýlyq saqtaý tólqujaty jasaldy. Al elektrondy tólqujattyń artyqshylyǵy – buǵan deıin azamattar emhana, aýrýhanalardan alǵan joldamalaryn, ambýlatorlyq qujattaryn túgel arqalap, áýrege tússe, endi jeke kýálik arqyly tirkelýge de, em alýǵa da dańǵyl jol ashyldy. Sózsiz, sıfrly júıeniń pasıentke de, dárigerge de paıdasy mol ekeni aıqyndaldy.
Sıfrlandyrýdy engizý barysyn ańdaýǵa arnalǵan joba barysynda kóptegen aýyldyq mekender úshin ınternet jelisiniń qattyǵy belgili boldy. Alaıda 2022 jylǵa deıin aýdan men aýyldyq jerlerge Aqparat jáne kommýnıkasııalar mınıstrligimen birlesip, ınternet jelileri tartylyp, odan basqa, ınternet jetkizý múmkindigi joq, tym shalǵaı mekenderge Qorǵanys jáne aeroǵarysh ónerkásibi mınıstrlikterimen birlese spýtnık qurylǵylar ornatýdyń qajettigi baıqaldy. Bir qýanarlyǵy, Qazaqstan boıynsha mundaı eldi mekender basymdyqqa ıe emes. Sondyqtan qańtardyń alǵashqy kúnderinen sıfrlandyrý emdeý mekemelerinde aınalymǵa engizilip, medısınalyq qujattardyń 200-den asa formasy elektrondy formatqa kóshirildi. Iаǵnı, Densaýlyq saqtaý mınıstrligi 2019 jylǵy 1 qańtardan bastap densaýlyq saqtaý uıymdarynda medısınalyq qujattardy qaǵazsyz, sıfrly formatqa kóshirý aıasynda bastapqy medısınalyq qujattamanyń 62 formasyn alyp tastap, 221-in elektrondy formatqa kóshirip, avtomattandyrý maqsatynda 12 formany biriktirdi.
Biz osy oraıda Astanadaǵy №4 emhananyń bas dárigeri Serik Shaımerdenovten sıfrlandyrý barysynyń qalaı júrip jatqany jaıly suraǵan edik. Bas dárigerdiń aıtýynsha, emhana 2018 jyldyń mamyr aıynan bastap keshendi medısınalyq aqparat júıesin jáne pasıenttiń densaýlyq saqtaý tólqujatymen elektrondy jeke kabınet júıesin engizgen eken.
– Keıinirek emdelýshige laboratorııalyq zertteýdi jáne kórsetiletin qajetti medısınalyq qyzmet týrasynda smartfon arqyly tegin habarlama jiberetin «DamuMed» qosymshasyn iske qostyq. Mobıldi qosymsha kómegimen 6 myńnan astam pasıent dárigermen baılanysqa shyǵyp otyrdy.
Olardyń ishinde aıaǵy aýyr 600 áıel, bes jasqa deıin balalary bar 2 myń ata-ana boldy. Biz sıfrly júıeniń tıimdi ekenin, onyń eki jaqqa da qolaılylyǵyna kóz jetkizdik. Elektrondy kartany engizý arqyly birtalaı kórsetkishimiz jaqsardy. Atap aıtqanda, dálizde kezek kútý azaıdy, dáriger qabyldaý ýaqytynda pasıenttiń deregin toltyryp otyrmaıtyn boldy, nátıjesinde naqty tekserýge, aýrýǵa kóńil aýdarýǵa ýaqyt bóldi. «DamuMed» arqyly jáne saıt qyzmetin paıdalanyp qabyldaýǵa jazylǵan, joǵaryda atalǵandaı ózge de ilgerileýshilikti sezingen pasıentterdiń 2018 jyldyń sońǵy úsh aıynda jumysymyzǵa qanaǵattanýy 8 paıyzǵa artty. Bizge keregi – osy, – deıdi S.Shaımerdenov.
Iаǵnı, dáriger bas kótertpeıtin qaǵazbastylyqtan aryldy, endigi bar nazar pasıentke aýýy tıis.
Anar TО́LEÝHANQYZY,
«Egemen Qazaqstan»
