Reseıdiń Halyq ártisi, balet trýppasynyń kórkemdik jetekshisi Altynaı Asylmuratova elimizdiń jetekshi BAQ ókilderine suhbat berip, onda eýropalyq kórermenniń ystyq yqylaspen qarsy alǵandyǵyn atap ótti. Sondaı-aq A.Asylmuratova trýppaǵa jańa tájirıbe beretin gastrolderdiń mańyzdylyǵyna erekshe toqtaldy.
- Gastrol «Rýhanı jańǵyrý» baǵdarlamasyn júzege asyrý aıasynda QR Mádenıet jáne sport mınıstrligimen uıymdastyrylǵan bolatyn. Eýropalyq gastroldik sapar ulttyq operanyń jaýhary A.Jubanov pen L.Hamıdıdiń «Abaı» operasynyń qoıylymymen 2018 jyly qarashada bastalyp, Italııa men Ispanııada balettik spektakldermen jalǵasyn tapty, onda ártister P.Chaıkovskııdiń «Shelkýnchık» pen «Aqqý kóliniń» 18 spektaklin usyndy. Bir aı ishinde baletterdi shamamen 22 myń kórermen tamashalaǵan. Genýıa men Valensııanyń kórermenderi bizdi jyly nıetpen qarsy aldy. Osy ýaqyt ishinde «Astana Opera» teatry men qazaqstandyq kórermendi saǵynyp úlgerdik. Aldymyzda aýqymdy jumystar, jańa spektaklder tur, biz sizderdi asyǵa kútemiz, dedi A.Asylmuratova.
- Elge qaıtyp oralǵanymyzǵa óte qýanyshtymyz, teatrymyz ben kórermenderimizdi qatty saǵynyp qaldyq. Gastroldik sapar joǵary deńgeıde ótti, barlyq jerde bizdi súısine qarsy aldy, bul bizge qýanysh syılaıdy. Elimizdi ózge memlekette kórsetý, tanystyrý jaýapty is edi, biz minsiz tehnıka men akterlik sheberlikti pash etýge tıisti edik, synshylardyń pikirlerine qaraǵanda, bul qolymyzdan kelgen sııaqty, dedi jetekshi solıst, Qazaqstannyń eńbek sińirgen qaıratkeri Mádına Basbaeva.
