Qalashyqta shyǵys ertegileriniń alýan obrazdaǵy keıipkerleri men ishi gúl-destege toly muz músinder jaǵalaı ornalastyrylǵan. Odan árirek aıaq bassańyz túrli-tústi áshekeılermen bezendirilgen muz kópir arqasyn tosady. Saıabaqtaǵy «sen tur, men ataıyn» degendeı túrli kórinistegi muz músinderdiń qaısysy bolsyn estetıkalyq kúsh-qýatymen, tartymdylyǵymen tańdaı qaqtyrady.
Taqyrypty ashý, jyldamdyq, oryndaý sheberligine qaraı qazylar alqasynyń tańdaýymen úzdik jumystar anyqtaldy. Bas júldeni Aqmola oblysynyń «Dalalyqtar» toby ıelense, birinshi orynǵa qytaılyq «Harbın» toby laıyq dep tanyldy. Ekinshi oryndy astanalyq «Astana ise master» toby alsa, Qytaıdyń «Gonkong» komandasy úshinshi orynnan kórindi. Júldeli oryn alǵan qatysýshylarǵa ákimdik tarapynan 3 mıllıon teńge kóleminde aqshalaı syılyqtar tartý etildi.
Esil aýdany ákimi orynbasarynyń mindetin atqarýshy Nurlan Omarov bastama kelesi jyly da jalǵasatynyn aıtady.
– Muz qalashyǵy shyǵys ertegisi úlgisinde jasaldy. Bul isimiz qala turǵyndary men qonaqtaryna unaıdy degen úmittemiz. Sondyqtan aýdandyq ákimdik sharany dástúrge aınaldyrýdy josparlap otyr, – deıdi Nurlan Omarov. Sondaı-aq botanıkalyq baqtyń aýmaǵynda balalar men eresekterge arnalǵan muz aıdyny da qarastyrylǵan. Onda konkıler men tıýbıngter jalǵa beriledi. Endi kóktem kelgenshe elorda qonaqtary men turǵyndaryna muz qursanǵan saıabaqtyń esigi aıqara ashyq.
Aıa О́MIRTAI,
«Egemen Qazaqstan»
