О́.Joldasbekov atyndaǵy stýdentter saraıynda olımpıadada jeńimpaz tanylǵan oqýshylar men mektep ujymdary marapattaldy. Olımpıadanyń Bas júldesi bıylǵy jyly eki jyl qatarynan Chelıabi qalasynyń №31 lıseıi oqýshylarynyń enshisine tıse, birinshi oryndy Jáýtikov atyndaǵy fızıka-matematıka mektebiniń oqýshylary ıelendi. Úzdik nátıje kórsetken oqýshylarǵa matematıka páni boıynsha 91 medal (20 altyn, 26 kúmis jáne 45 qola medal), fızıka páni boıynsha 71 medal (15 altyn, 21 kúmis jáne 35 qola medal), ınformatıka páni boıynsha 74 medal (14 altyn, 23 kúmis jáne 37 qola medal) oınaldy. Qazaqstandyq oqýshylar 9 altyn, 23 kúmis jáne 43 qola medaldi enshilese, jeke reıtıng boıynsha matematıkadan Bolgarııa, fızıkadan Reseı, ınformatıkadan Grýzııa oqýshysy úzdik dep tanyldy.
Jasóspirimder arasynda matematıka-fızıka, ınformatıka ǵylymyn nasıhattaýdy, halyqaralyq yntymaqtastyqty nyǵaıtýdy, álem elderindegi arnaıy mektepter arasyndaǵy baılanystardy nyǵaıtyp, tájirıbe almasýdy maqsat ete otyryp ótkizilgen saıysqa Jáýtikov mektebiniń oqýshylary erekshe daıyndyqpen kelgen. Olımpıadalyq rezerv trenerlerinen dáris alǵan oqýshylar psıhologııalyq daıyndyqtardan da ótken. Jáýtikov atyndaǵy fızıka-matematıka mektebi dırektorynyń Olımpıada boıynsha orynbasary Ashat Kárim bıylǵy jyly AQSh (South Carolina Governor’s School of Science and Math) jáne Danııa (Maria Kruse Skole) kelgen komandalardyń birinshi ret qatysyp otyrǵandyǵyn jetkizdi. Olımpıada barysynda oqýshylardyń ǵana emes, ıaǵnı fızıka-matematıka mektepteriniń jetistikteri de synǵa tústi.
Bıylǵy jyly qatysýshylar elektrondy túrde tirkelip, arnaıy saıt jumysy iske qosylǵan. Olımpıada esepteri halyqaralyq qurastyrýshylardyń qatysýymen ázirlengen.
Elvıra Serikqyzy,
«Egemen Qazaqstan»
ALMATY
