- Úlkenshyǵan aýylynyń turǵyndary aýyl syrtynan burynǵy jertóleni baıqap, qazǵan kezde áskerı qazyna taýyp alypty. Topyraq astyna muqııat jasyrylǵan keńestik zamannan qalǵan tank eken. Áskerı tehnıkanyń qańqasyn kórgen turǵyndar jergilikti ýchaskelik polısııa ınspektoryna habar bergen. Qazir topyraqqa «tyǵylǵan» tankti áskerıler alyp ketti, - dedi bul týraly bizge Panfılov aýdany ákiminiń baspasóz hatshysy Nurbol Qanaǵat.
Tabylǵan áskerı tehnıkanyń Keńes áskerinen qalǵany anyq. Az-kem sheginis jasasaq, 1950-60 jyldary Sovet odaǵy men Qytaı halyq respýblıkasynyń arasyndaǵy shıelenis soǵys jaǵdaıyna jetip, eki el shekara mańyna ásker shoǵyrlandyrǵany málim. Búginde kórshi eldiń tarıhı oqýlyqtaryna «Qytaı men SSRO arasyndaǵy Uly soǵys» atty taqyryppen kirgen bul qaqtyǵys qos memleket basshylary Mao Szedýn men Nıkıta Hrýshevtiń jeke ambısııalarynyń kesirinen tutanǵan deıdi táýelsiz sarapshylar.
Qyrǵı-qabaq qarym-qatynas Kremlge L.Brejnev basshylyqa kelgende tipti sharyqtap, Daman aralynda jáne Jalańashkól zastavasyndaǵy shekarashylar arasynda qandy soǵys bolǵan edi. Mine, osy tusta ıek astyndaǵy Qytaıdan qorǵaný maqsatynda shekara shebindegi Almaty oblysynyń Panfılov, Narynqol aýdandary áskerı jaǵdaıǵa kóshken bolatyn. Sol jyldary Almaty qalasynan shyǵyp, Narynqol, Kegen, Uıǵyr aýdandaryna baǵyt alatyn tas jol jedel salynyp, áskerı ushaqtar qonýǵa yńǵaılanyp jasalǵany týraly da qyzyqty derek bar.
Keshe Úlkenshyǵan aýyly mańynan tabylǵan tank te sol kezdiń murasy ekeni anyq. «Tabylǵan tank adam ómirine qaýip tóndirmeıdi. Tehnıka temir qaldyǵy retinde qaıta balqytýǵa jiberiledi» deıdi oqıǵaǵa túsinik bergen polısııa ókilderi.
Qalmahanbet MUQAMETQALI,
«Egemen Qazaqstan»
Almaty oblysy
