Oqý jyly bastalysymen áskerı bólimderde jappaı jaýyngerlik daıarlyq boıynsha sabaqtardyń qarqyndylyǵy beleń alýda. Osy úrdistiń basty jetekshileriniń biri bolyp serjanttar quramy jumys jasaýda. Olar ózderiniń aǵymdyq tapsyrmalary men máselelerin Serjanttar keńesinde talqylap, ózekti máselelerdiń sheshimderin tapty.
Sonymen qosa, otyrysta serjanttardyń abyroıy men namysyna, áskerı seriktestik, áskerı bólimge jańadan kelgen áskerı qyzmetshilerge qalyptasýda kómek kórsetýge qatysty kóptegen ózekti máseleler talqylandy. Odan basqa, serjanttardyń otbasylarynda moraldyq-adamgershilik jaǵdaıdy nyǵaıtý, balalary oqıtyn mektepterge kómek kórsetý, olardyń áleýmettik-turmystyq jaǵdaılaryn jaqsartý máseleleri qaraldy.
-Kishi komandırler jeke quramdy basqarýda negizgi tetikke ıe. Serjanttardyń jumysyndaǵy sáttilik kóbinese olardyń ózderiniń jeke paryzy men baǵynystylarynyń isteri men qylyqtaryna jaýapkershilikti qanshalyqty sezinetine baılanysty. Olar árdaıym bilimderi men tájirıbelerin jetildiredi, áskerı Jarǵymen berilgen quqyqtaryn oryndy paıdalanady, deıdi «Batys» óńirlik qolbasshylyǵynyń 3-synypty serjanty Tımýr Imanalov.
Qarýly Kúshterde serjanttardyń jalpy jáne áskerı mádenıetin arttyrý, olardy jastarǵa áskerı-patrıottyq tárbıe berý jumysyna tartý, sondaı-aq Qazaqstan armııasynda serjanttar korpýsynyń rolin nyǵaıtý maqsatynda jyl saıyn Búkilarmııalyq serjanttar keńesi ótkiziledi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
