2018 jyly Turǵyn úı qurylys jınaq banki zańnama ózgergennen keıin áskerıler baspana satyp alý úshin 70 myń arnaıy shot ashty. Bul shottardaǵy aqshaǵa qol suǵylmaıdy jáne áskerı qyzmetkerlerdiń boryshtaryna baılanysty qandaı da bir nesıe tólenbegen jaǵdaıda tutqynǵa alynbaıdy.
2018 jyldyń shilde aıynda «Áskerı baspana» baǵdarlamasy iske qosyldy. Bank páter satyp alý úshin áskerı qyzmetshilerge jeńildik sharttaryn usyndy: jyldyq syıaqy mólsherlemesi 6%-dan 8%-ǵa deıin, bastapqy jarna — 5%-dan 20%-ǵa deıin. Qaryzdy kóp ball jınaǵan úmitkerler alady. Upaılar qyzmettiń árbir tolyq aıy úshin esepteledi. Kim uzaǵyraq qyzmet etse, sonyń múmkindigi joǵary bolady.
«Áskerı baspana» baǵdarlamasynyń sharttary boıynsha páter qunynyń 5% ǵana jınaǵan áskerı qyzmetshiler jyldyq 7% stavka boıynsha nesıe ala alady. Shart boıynsha páterdi tek bastapqy naryqta satyp alýǵa bolady: páter qunynyń 20%-yn jınaǵandar qurylys salýshydan jyldyq 6%-ben jańa turǵyn úı satyp alýǵa nesıe rásimdeı alady. Ekinshi naryqta turǵyn úı satyp alǵysy keletin áskerı qyzmetshiler jyljymaıtyn múlik qunynyń 20%-yn engizýi tıis, al nesıe boıynsha jyldyq mólsherleme 8%-dy quraıdy.
L. Ibragımovanyń aıtýynsha, «Qazaqstannyń turǵyn úı qurylys jınaq banki» AQ arnaıy ázirlengen askeri.baspana.kz saıty arqyly 13 myń ótinish tústi. Onyń ishinde 5,5 myń áskerı qyzmetshi nesıe boıynsha oń sheshim aldy, qujattarǵa qol qoıylyp, qazirgi ýaqytta olar páter izdestirýde.
2250 adam TQJB-dan qoljetimdi nesıe alyp, óz páterlerine qonystandy. 250 áskerı qyzmetshiniń qujattary bankte qaraýda jatyr.
«2019 jyldyń 1 sáýirine deıin nesıe boıynsha oń sheshim alǵan 5,5 myń áskerı qyzmetkerdiń barlyq qujattaryn qarap, ekinshi baǵdarlamany bastaýdy josparlap otyrmyz», — dedi L. Ibragımova.
«Qazaqstannyń turǵyn úı qurylys jınaq banki» AQ Basqarma tóraǵasy BAQ ókilderiniń suraqtaryna jaýap bere kele, onlaın rejıminde qyzmet kórsetý boıynsha júrgizilip jatqan jumystar týraly da aıtty.
«Nurly jer» baǵdarlamasy boıynsha salynyp jatqan barlyq nysandar týraly qazaqstandyqtar baspana.kz saıty arqyly bile alady. Portalda qoljetimdi sharshy metrge úmitker páterdi satyp alǵysy keletin qalany tańdap, qandaı nysandar salynatynyn, ótinishterdi qabyldaý retin bilip, unaǵan páterdi tańdap, turǵyn úıdi satyp alýshylar pýlyna qatysýǵa ótinim bere alady.
«Jyl saıyn salymshylardyń sany ósýde: bizde 1,2 mln salymshy bar, al 3 jyl buryn olardyń qatary 600 myń ǵana bolǵan edi. Alaıda osyǵan qaramastan banktegi adamdar sany ulǵaıyp jatqan joq. Sondyqtan sońǵy 3 jyl ishinde biz barlyq bıznes-prosesterdi avtomattandyrýǵa basa nazar aýdaramyz», — dedi L. Ibragımova.
Birinshiden, keńesshini úıge shaqyrý múmkindigi bar jáne ol óziniń arnaıy plansheti arqyly úıińizge kelip depozıt ashyp bere alady. Ekinshiden, salymshylar kez kelgen banktiń kartochkasynan depozıtti esh komıssııasyz soma mólsherine qaramastan tolyqtyra alady. Avtomattandyrýdyń úshinshi kezeńi-elektrondyq portal arqyly qujattardy berý. 2018 jyl boıy ótinimderdi jınaý, páterlerdi bólý jáne basqa da prosester JTQJB ınternet-bankıngimen baılanysty baspana.kz portaly arqyly júrgizildi.
«Biz aldyn ala biliktilik boıynsha úlken jobany júzege asyrýdy josparlap otyrmyz. Kóptegen salymshylardy tabysy aıyna 100-120 myń teńge bolǵanda olar qandaı somaǵa úmittene alatyny tolǵandyrady. “Aldyn ala biliktilik” ınstıtýty 2019 jyldyń basynda jumys isteıdi jáne árbir salymshyǵa bankte qaryz qandaı somaǵa maquldanýy múmkin ekendigi týraly aqparat alýǵa múmkindik beredi», — dep túsindirdi spıker.
Salymshynyń ortasha jasy-36 jas. 150 myń balalar depozıti 0-18 jas aralyǵynda ashyldy. L. Ibragımovanyń aıtýynsha, TQJB qyzmetin bir ret paıdalanǵan adamdar artyqshylyqtardy túsine otyryp, bala týǵannan bastap qarjy jınaı bastaıdy. Árbir úshinshi salymshy 18-29 jas aralyǵyndaǵy adamdar, bul spıkerdiń aıtýynsha, basym topqa jatady.
«Jastar (eskertý. – 2019 jyldy Memleket basshysy Jastar jyly dep jarııalady) jyly jas otbasylar úshin ár-túrli bastamalardy usynatyn bolamyz. Baǵdarlamany bastapqy naryqta ǵana emes, ekinshi naryqta da qarastyryp, onyń keńeıýine qajet quraldardy saralap qarastyramyz. О́ıtkeni, biz salymshylardyń túrli segmentterin zerdeleı kele, biz halyqtyń ár bóliginiń óz qajettilikterin baıqadyq. Basynda adamdar baspanaly bolǵysy kelip, bir bólmeli páterdi satyp alǵysy keledi. 3-4 jyldan keıin balalary paıda bolǵan soń turǵyn úı kólemin ulǵaıtý týraly ótinish bildiredi. Bul ómirlik sıkl óte mańyzdy, biz otbasynyń árbir kezeńinde salymshylardyń qajettiligin qanaǵattandyra alatyn baǵdarlamalardy ázirleýge tyrysamyz», — dep túıindedi sózin bank basqarmasy.
