Memleket basshysy 2018 jylǵy 7 qarashada ótken Qaýipsizdik Kenesiniń otyrysynda aıtqan tapsyrmalardy qolǵa alyp, tarıf qalyptastyrý júıesiniń aıqyndyǵyn qamtamasyz etý jáne kommýnaldyq tólemderdi tómendetý maqsatynda elimizde naqty is-sharalar júrgizilýde. Osy is-sharaǵa baılanysty «Nur Otan» partııasynyń Almaty qalalyq fılıalynyń baspasóz máslıhatynda ótken basqosýda memlekettik organdar men kommýnaldyq qyzmettiń basshylary osy jóninde tolyqqandy aıtyp berdi.
Olardyń málimetinshe, aǵymdaǵy jyldyń 1 qańtarynan bastap ońtústik megapolıste gazdyń baǵasy 16 paıyzǵa, sýmen jabdyqtaý, sýdy paıdalaný 10 paıyzǵa, jylýmen jabdyqtaý 18 paıyzǵa, jedelsatylardy ustaý shyǵyny 8,5%-ǵa tómendedi. Osyndaı jumystar elektr energııasy tarıfterin tómendetý baǵytynda qolǵa alynyp jatyr. PIK (páter ıeleriniń kooperatıvi ) qyzmetteri boıynsha turǵyndardyń qosymsha qyzmetterge tóleıtin shyǵyndary tómendetiledi.
Jolaýshylar tasymaldaý boıynsha 2012 jyly bekitilgen qoǵamdyq kólik aqysy 80 teńge kúıinde qalyp otyr. Ol úshin qalalyq bıýdjetten 2018 jyly 14,7 mlrd teńge kóleminde sýbsıdııa tólendi. Bıyl bul bólingen qarjy eki esege ósken. Onyń kólemi 37,8 mlrd teńgeni quraǵan.
Eske sala ketsek, ótken jyly monopolısterdiń amortızasııalyq shyǵyndar úshin tólemderdi maqsatsyz jumsaǵanyna baılanysty «Nur Otan» partııasy AQF Saıası keńesiniń Bıýrosynda qaralǵandaı, prokýratýra tekserý nátıjesinde qalalyqtarǵa 4,5 mlrd teńge kólemindegi qarjyny kommýnaldyq tólem tarıfy retinde qaıtarylatyny aıtylǵan edi. Onyń ishinde: «AlmatyEnergoSbyt» - 1,4 mlrd, «Alataý Jaryq Kompanııasy» -2,1 mlrd teńge.
«QazTransGazAımaq» AQ – 500 mln, «Almaty sý» - 326 mln teńge. Bul týraly jıyn barysynda «Nur Otan» partııasy Almaty qalalyq fılıaly tóraǵasynyń birinshi orynbasary Stanıslav Kankýrov, Almaty qalalyq Energetıka jáne kommýnaldyq sharýashylyq basqarmasynyń basshysy Maqsat Isahov pen Ekonomıka mınıstrligi Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Almaty qalasy boıynsha departamentiniń basshysy Bolat Sambetov málimdegen bolatyn.
Saparbaı PARMANQUL,
«Egemen Qazaqstan»
ALMATY
