Berdibek Saparbaev iri óndiristik kásiporyndardyń biri Aqtóbe hrom qosyndylary zaýyty AQ-nyń basshylyǵymen jáne eńbek ujymymen kezdesti.
AHQZ AQ-nyń basqarma tóraǵasy Alekseı Hımıch óndiristik baǵdarlama men ujymdyq kelisimsharttyń 2018 jyl ishindegi oryndalýy týraly baıandady.
Onyń aıtýynsha, byltyr zaýyt 107 486 tonna ónim óndirgen, bul 2017 jylǵy deńgeıden joǵary bolyp otyr. Kásiporyn qyzmetkerlerdiń aldyndaǵy jalaqy boıynsha jáne áleýmettik mindettemelerin tolyq kólemde oryndady. Búginde zaýytta 2 200 – den astam aqtóbelik eńbek etedi. Ortasha aılyq jalaqy – 149,4 myń teńge.
Baıandamany tyńdaǵan Berdibek Saparbaev kásiporyn basshylyǵyna tıimdi jumys istegenderi úshin alǵysyn aıtyp, 2019 jylǵa arnalǵan mindetterdi belgiledi.
«Aǵymdaǵy jyly turaqtylyqty saqtaı otyryp, óndiris kóleminiń qysqarýyna jol bermeý mańyzdy», - dep atap ótti óńir basshysy.
Oblys ákimi ujymdyq sharttardy oryndaý, qyzmetkerlerdiń jalaqysyn arttyrý, jumys oryndaryn saqtaý máselelerine erekshe nazar aýdardy. Sondaı-aq ol Elbasynyń óndiristi sıfrlandyrý jáne jańǵyrtý jónindegi tapsyrmasyn iske asyrýǵa belsendi at salysýǵa, qazaqstandyq mazmun men áleýmettik jaýapkershilikti damytýdy jalǵastyrýǵa shaqyrdy. Budan basqa oblystaǵy oqý oryndarmen kásiporyn úshin talap etiletin mamandardy daıyndaýǵa uzaq merzimdi sharttar jasasý múmkindigin qarastyrý qajet.
Kezdesý oblys ákimdigi, kásiporyn basshylyǵy men kásipodaqtardyń aýmaqtyq birlestigi arasynda eńbek qatynastaryn retteý, qyzmetkerler úshin áleýmettik kepildikterdi qamtamasyz etý máselelerinde óńirlik deńgeıde odan ári kelisilgen is-qımyldar men ózara túsinistik týraly memorandýmǵa qol qoıýmen aıaqtaldy.
Osyǵan uqsas kezdesý Aqtóbe rels – arqalyq zaýytynda da ótti. Kásiporyn Qazaqstan Respýblıkasyn údemeli ındýstrııalyq-ınnovasııalyq damytý jónindegi memlekettik baǵdarlama aıasynda salynǵan ınnovasııalyq joba bolyp tabylady. Munda 800 – ge jýyq adam eńbek etedi. Ortasha aılyq jalaqy – 237, 1 myń teńge. Zaýyttyń kásipodaq birlestigi tek ótken jyly ǵana quryldy.
Kezdesý barysynda zaýyttyń barlyq qyzmetkerleri suraq qoıa aldy. Olardy qoǵamdyq kólik jumysy men balabaqshalardyń jumys kestesin qaıta qaraý múmkindigi qyzyqtyrdy. Aqtóbe rels arqalyq zaýyty JShS ujymymen kezdesý de memorandýmǵa qol qoıýmen aıaqtaldy.
О́ńir basshysy óndiristik ujymdardy Aqtóbeniń 150 jyldyq mereıtoıyna oraı óz qalalaryn damytýǵa úles qosýǵa shaqyrdy:
«Bul mereıtoıǵa qalanyń árbir turǵyny qatysýy kerek. Ár adam týǵan ólkesiniń damýyna úles qosýy tıis. Sondyqtan, árbir turǵyn óz aýlasy men aýmaǵyn kógaldandyryp, kórkeıtýine bolady», - dedi oblys basshysy.
2018 jyly oblys boıynsha óndiristik prosesterdi turaqtandyrý, qyzmetkerlerdiń eńbek quqyqtary men kepildikterin qamtamasyz etý boıynsha 4781 memorandým jasaldy. Olardy iske asyrý nátıjesinde ótken jyly oblystaǵy 591 kásiporynda eńbekaqy kóterildi. Jalaqynyń ósýi negizinen óndiris qyzmetkerlerine áser etti.
Mysaly, 2018 jylǵy qańtardan bastap SNPS-Aqtóbemunaıgaz AQ qyzmetkerleriniń jalaqysy 12 - den 23%-ǵa deıin, SNPS - Aqtóbe Kólik Kompanııasy JShS - 7-23% - ǵa deıin, Qazaqoıl Aqtóbe JShS, Voshod-Oriel JShS, Voshod Hrom JShS, ARBZ JShS, Shyǵys munaı jáne servıstik qyzmet kórsetý JShS, Bazalt-A JShS-niń jáne de basqa da kásiporyndarda jalaqy 10%-ǵa ósti.
