Igilikti is-sharanyń maqsaty - kóp balaly jáne az qamtylǵan otbasylarǵa, jalǵyzilikti zeınetkerler men múgedekterge, ata-ana qamqorlyǵynsyz qalǵan jáne aýyr syrqatqa shaldyqqan balalarǵa kómek kórsetýge baǵyttalǵan. «Meıirimdilikpen birlikke» uranymen ótip jatqan aksııa barysynda «Assambleıa» korporatıvtik qory Túmen oblysy qazaqtarynyń ulttyq-mádenı avtonomııasy jáne «Orys, slavıan jáne kazak uıymdarynyń qaýymdastyǵy» birlestiginiń oblystyq fılıalymen birlesip, ata-ana qamqorlyǵynsyz qalǵan balalarǵa syılyqtar tartý etti. Turmysy tómen Mıhaılovtar otbasyn qamqorlyqqa alyp, ýaqytsha turǵyn úımen, azyq-túlikpen qamtamasyz etti. Otbasynyń baspanasyn qaıta qalpyna keltirýge nemese jańadan baspana satyp alýǵa qarajat jınalyp jatyr.
Kóp balaly Psarevtar otbasyna da gýmanıtarlyq kómek kórsetildi. Toǵyz balany jalǵyz tárbıelep otyrǵan ananyń qaraılasar janashyry qalmaǵan. Assambleıa eriktileri azyq-túlik pen turmystyq qajetti zattardy jetkizip berdi.
Etnomádenı birlestikteri de qaıyrymdylyq aksııasyna belsene qatysyp jatyr. «Qazaqstandaǵy orystar qaýymy» jáne «Sibir kazaktary baýyrlastyǵy» qoǵamdyq birlestikteri fılıaly ókilderi birlesip, múgedekter quqyǵyn qorǵaý qoǵamynyń tárbıelenýshilerine arnap konsert qoıyp, syılyqtar tartý etti. Al Rojdestvo meıramy qurmetine uıymdastyrylǵan tańerteńgilikke az qamtylǵan otbasylar shaqyryldy. «Dýslyk» tatar-bashqurt ortalyǵynyń ónerpazdary búldirshinderge konserttik baǵdarlama usyndy.
Taıynshalyqtar qaıyrymdylyq aksııasyn qala ortalyǵyndaǵy muz qalashyǵynda ótkizdi. Ardagerler qozǵalysynyń belsendileri kóp balaly jáne turmys jaǵdaıy tómen otbasy balalaryna táttiler usyndy. Býlaevo qalasyndaǵy pravoslav shirkeýiniń dindarlary az qamtylǵan otbasy balalaryna oıynshyqtar men kıim-keshekter taratty. Shal aqyn aýdanynda uıymdastyrylǵan aksııaǵa barlyq aýyldyq okrýgter qatysyp, soǵys ardagerleri men tyl eńbekkerlerine, sondaı-aq, turmysy tómen otbasylarǵa qoldaý kórsetildi.
О́ńirimizde mundaı ıgi sharalar jyl boıy jalǵasyn tabatyn bolady.
О́mir ESQALI,
«Egemen Qazaqstan»
Soltústik Qazaqstan oblysy
