Respýblıka boıynsha 2019 jyldyń 18 qańtarynda, ıaǵnı búgin saǵat 9:00-de oqýdyń aqyly bólimine túsýshiler úshin Ulttyq biryńǵaı testileý bastaldy. Elimiz boıynsha 18-20 qańtar aralyǵynda 35 838 talapker synaqqa qatysady. Onyń ishinde 61-i bilimin aǵylshyn tilinde synaıdy. UBT-ny shet tilinde tapsyrýshylar sanynyń artýyna «Halyqaralyq baǵdarlamalar ortalyǵy» AQ qyzyǵýshylyq tanytyp otyr. Osyǵan oraı testilenýshilerge yntalandyrý retinde joǵary ball jınaǵan oqýshyny sheteldik JOO-ǵa grantqa túsirmekshi.
«QR BǴM «Halyqaralyq baǵdarlamalar ortalyǵy» AQ basshysy Janbolat Meldeshov testi aǵylshyn tilinde úzdik tapsyrǵan talapkerge grant bólýge daıyn ekendigin aıtyp, birqatar sheteldik seriktes JOO-ny belgiledi» deıdi mınıstrlik ókilderi.
«Jalpy, sheteldik joǵary oqý oryndarynda bilim alýǵa múmkindik óte kóp. Bıyl sheteldik JOO-lar bizdiń azamattarǵa 40 000 grant bólýge daıyn. Bul – ár talapkerdiń tegin bilim alýǵa múmkindigi bar degen sóz. Mektep túlekteri UBT sertıfıkatymen qazaqstandyq JOO-larǵa ǵana emes, sheteldik oqý oryndaryna da túse alady. Mysaly, Túrkııa joǵary oqý oryndaryna bizdiń sertıfıkatymyzben baryp, oqı alady. Ol úshin aǵylshyn jáne túrik tilderin bilýi kerek», — deıdi J.Meldeshov.
Sońǵy jyldary aǵylshyn tilinde bilim berý qarqyndy damyp keledi. Keıbir qazaqstandyq mektepterde aǵylshyn tilinde pánder engizilgen. Aǵylshyn tilinde test tapsyrýdyń basty maqsaty – sheteldik JOO-ǵa túsýge degen nıet. Bul suraq boıynsha talapkerlerge «Halyqaralyq baǵdarlamalar ortalyǵy» kómektesýge daıyn.
