«Qaraǵandy oblysy Polısııa departamenti 13 qańtarda Qaraǵandy oblysy Nura aýdanynda bolǵan oqıǵaǵa baılanysty sotqa deıingi tergeý jumystaryn júrgizip jatyr. Keshendi tergeý jumystarynan keıin qylmysqa qatysy bar úsh adam anyqtaldy. Kúdiktilerge memleketaralyq izdeý jarııalandy», delingen Ishki ister mınıstrliginiń habarlamasynda.
Esterińizde sala keteıik, alty kún buryn «Ohotzooprom» О́B» RMQK eki ınspektory men brakonerler arasynda qaqtyǵys bolyp, tabıǵat qorǵaýshylary aýyr jaraqat alǵan-tuǵyn. Kóp uzamaı ınspektor Erlan Nurǵalıev qaza tapty.
Sondaı-aq ınspektor ólimine kúdiktilerdiń aty-jóni jarııalandy. Olar: K.V. Aqshanovtyń, B.M.Ahmetov jáne N.M.Shúkildekov. Oblystyq Polısııa departamenti kúdiktilerge qatysty málimet biletinderdi 102 nemese 8(7212)429204, 429190, 429025, 429026 nómirlerine habarlasýdy suraıdy.
Oqıǵa qoǵamda qyzý talqyǵa tústi. «Egemen Qazaqstan» gazeti kópshiliktiń nazaryn aýdarǵan qaıǵyly oqıǵanyń basty keıipkeri Erlan Nurǵalıevtiń 2018 jyly túsirilgen fotosýretin «Apta fotosy» retinde jarııalady.
