Qazaqstan • 19 Qańtar, 2019

«Nur Otan» mektep ashanalaryn jalǵa alýshylardy tekserýmen aınalyspaıdy

589 retkórsetildi

«Nur Otan» partııasynyń Ortalyq apparatynda ótken mektep ashanalary jónindegi Respýblıkalyq sarapshylar tobynyń birinshi keńesinde mektep ashanalaryna tıeseli baqylaýdy qamtamasyz etý men shaǵyn jáne orta bıznestiń múddesin qorǵaýdyń aralyǵyndaǵy máselede ymyraǵa kelýdiń jaýaby izdestirildi, dep habarlaıdy partııanyń baspasóz qyzmeti.

Buryn-sońdy habarlaǵanymyzdaı, mektep ashanalarynyń birqatar ózekti máselelerin sheshý jáne ata-analar komıtetiniń, ashanalardy jalǵa alýshylardyń, mektep ákimshiligi ókilderi men bilim basqarmasy ókilderiniń is-áreketin úılestirý úshin «Nur Otan» partııasy «Mektep ashanalary» jobasyn daıyndaǵan edi. 

Oǵan ata-analar qoǵamdastyǵynyń áleýmettik jelilerde jazǵan balalardy tamaqtandyrýdyń sapasyna kóńili tolmaýshylyǵyna baılanysty pikirleri sebep boldy. О́tken jyly partııa biz tilge tıek etken máselelerdi sheshýge tıis arnaıy joba ázirlep, tujyrymdamasyn bekitip, sodan keıin naqty daıyndyq jumys júrgizgen. Nátıjesinde 2018 jyldyń sońynda nurotandyqtar mektep ashanalaryndaǵy tıym salynǵan birqatar azyq-túlikterdiń tizimin uzartýǵa qol jetkizdi (sosıskalar, kolbasa ónimderi, gambýrgerler, sondaı-aq, jasandy qosymshalary bar taǵamdar qosyldy), al, Jańa jyldan bastap «Mektep ashanalary» dep atalatyn partııalyq joba resmı túrde bastaý aldy. Quramynda ata-analar, parlamentarııler, «Nur Otan» partııasy óńirlik fılıaldarynyń, BAQ, ÚEU men memorgandardyń ókilderi bar vedomstvoaralyq sarapshylar toby búkil elimiz boıynsha mekteptiń tamaqtandyrý oryndaryna monıtorıng júrgizýge kirisip ketti.  Uıymdastyrý máseleleri men jobany iske asyrýdyń alǵashqy kúnderiniń nátıjesin talqylaý úshin «Nur Otan» mektep ashanalaryn tamaqtandyrýǵa baılanysty Respýblıkalyq sarapshylar tobynyń birinshi keńesin ótkizdi. Bul máseleni baqylaýǵa alǵan partııa Hatshysy Ilıa Terenchenkonyń tóraǵalyq etýimen ótken otyrysta kezdesýdiń qatysýshylary óz ıdeıalarymen bólisip, mektep ashanalarynyń jumysyn uıymdastyrý salasyndaǵy, mektep ashanalary monıtorınginiń qapyldyǵy, mektep ashanalary men as ázirleıtin jerlerde beınebaqylaý ornatý, sondaı-aq, beıindi normatıvtik quqyqtyq aktilerge ózgeris engizý týraly oılaryn ortaǵa saldy.  

Áńgime barysynda partııa Hatshysy elimizdiń óńirlerinde qurylǵan mektep ashanalary boıynsha Respýblıkalyq sarapshylar toby men vedomstvoaralyq sarapshylar tobynyń jumysyn qadaǵalaýshylyq is-áreketpen shatastyrýdyń qajeti joq ekenin atap ótkendi jón sanady.  - Keıbir BAQ bizdiń mektep ashanalary men ony jalǵa alýshylardy tekserip jatqanymyzdy jazyp úlgerdi. Bul túbegeıli qate túsinik. Biz tekseris emes, monıtorıng júrgizip jatyrmyz. Qaıtalap aıtamyn! Biz eshkimdi de jazalamaımyz, qandaı da bir kemshilikterdi joıýǵa baılanysty keńes qana beremiz. Jekelegen jaǵdaılarda biz óz usynystarymyzdy ókiletti organdarǵa jiberemiz. Alaıda, bizdiń bıznestiń isine aralasýǵa quqymyz joq. Tipti, «Nur Otan» partııasynyń basymdyqqa ıe maqsattarynyń biri – qazaqstandyq qoldaý kórsetý.  Onyń ishinde mektep ashanalary salasynda jumys istep jatqan kásipkerler de bar - dep málimdedi Ilıa Terenchenko.  

Bul eskertýler quramynda mektep oqýshylarynyń ata-analary, quqyqqorǵaýshylar, depýtattar, memlekettik qyzmetkerler jáne nurotandyqtardyń ózderi de bar sarapshylardyń arasynda qyzý pikirtalas týǵyzdy. Bir jaǵynan alyp qaraǵanda balalardyń densaýlyǵynan artyq eshteńe de joq. Jáne qandaı da bir kásipkerdiń kinasynan ashanada tamaqtanǵan oqýshylardyń jappaı ýlaný oqıǵasy oryn alǵanda, shaǵyn jáne orta bıznesti damytý máselesiniń basymdyqqa ıe bolǵany úshin kinalyny jaýapkershilikten bosatý týraly áńgime qozǵaý qanshalyqty qısyndy? Ekinshi jaǵynan normadan bolmashy ǵana aýytqýshylyq bolǵany úshin jumys oryndaryn quryp otyrǵan mektep ashanalaryn jalǵa alýshylardyń lısenzııasyn tartyp alyp, ony jumys istetpeı tastaý durys pa?

Bul máselede bıznestiń isine aralasý bolyp tabylatyn shekara qaıda?  Uzaqqa sozylǵan talqylaýlardyń nátıjesinde Respýblıkalyq sarapshylar tobynyń músheleri mektep ashanalaryna monıtorıng júrgizý qajet degen mámilege keldi. Alaıda, bul máselede mektep oqýshylarynyń qabyldanǵan standart boıynsha tamaqtanyp, shaǵyn jáne orta bıznestiń da toqtaýsyz damı bergeni mańyzdy. Aıtalyq, qandaı da bir kemshilikter anyqtalǵan jaǵdaıda kásipkerlerdiń ony túzeýine ekinshi múmkindik berilýi tıis.  

Sońǵy jańalyqtar

Uqsas jańalyqtar