«Atyraý JEO» AQ prezıdenti Aıbar Rahmanovtyń aıtýynsha, Almagúl yqsham aýdanyndaǵy 16 qabatty turǵyn úılerge jylý berilgen. Biraq qazir sý qubyrynyń qysymyn durystaý jumystary júrip jatyr.
- Gıdravlıkany qalpyna keltirgennen keıin bul úılerge keshkisin jylý beriledi,-dedi Aıbar Rahmanov.
Sonymen qatar, Balyqshy yqsham aýdanynda ystyq sýmen jabdyqtaý apatty jaǵdaıda isten shyqty.
- Balyqshy yqsham aýdanyndaǵy jeti úı ystyq sýsyz qaldy. «Grand Master» JShS jumysshylary apattyń saldaryn joıý jumystaryn júrgizip jatyr, turǵyndardy túsinistikpen qaraýǵa shaqyramyz,-deıdi qalalyq TKSh, jolaýshylar kóligi jáne avtokólik joldary bóliminiń basshysy Shákir Keıkın.
Atyraý qalasynyń ákimi Alımuhammed Quttymuratuly Almagúl yqsham aýdanyna baryp, turǵyndarmen kezdesti. Shahar basshysy problema tikeleı oblys ákiminiń baqylaýynda ekenin, barlyq quzyrly organdar jumyldyrylǵanyn atap ótti.
Zaqym kelgen ýchaskeni óshirgennen keıin qubyr jelileri sýmen toltyrylyp, qalaǵa jylý berý qalpyna keltirildi. Qazir magıstraldy qubyr jelisiniń zaqym kelgen ýchaskesin aýystyrý jumystary jalǵasyp jatyr.
Baqytgúl BABASh,
«Egemen Qazaqstan»
Atyraý
