Jıyn barysynda «Nátıjeli jumyspen qamtý jáne jappaı kásipkerlikti damytý» baǵdarlamasynyń júzege asyrylýy, jazasyn ótep shyqqandardy jáne probasııa qyzmetinde esepte turǵandardy jumyspen qamtý sııaqty birqatar mańyzdy degen áleýmettik másele qaraldy.
–Turǵyndardy jumyspen qamtý keshendi baǵdarlamasy aıasynda qolǵa alynǵan sharalarǵa 27,8 myń azamat qatystyryldy.Sóıtip, jyldyq jospar 135 paıyzǵa oryndaldy. Oblys boıynsha keshendi jospar asyra oryndalǵanmen, keıbir aýdandarda jospar tolyq kólemde júzege asyrylmady. Máselen, Qorǵaljyn aýdanynda qysqa merzimdi oqytýdan jyldyq jospar 6,9 paıyzǵa oryndalmady. Memlekettik baǵdarlamalar aıasynda jumys oryndaryn ashý kórsetkishi 5 aýdanda tıisti kórsetkishke jetpedi,– dedi oblystyq Jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanova.
О́ńirdiń birqatar aýdanynda memlekettik baǵdarlamalardy oryndaý kórsetkishi áli de bolsa tómen. Máselen, Zerendi, Shortandy, Ereımentaý, Jaqsy jáne Egindikól aýdandarynda jumys oryndary qajetti kólemde ashylmaǵan.
–Bizde jańa formattaǵy mekenjaılyq áleýmettik kómekpen qamtý kórsetkishi jospardan tómen boldy. Jospardaǵy 790 azamattyń 775-i bul kómekpen qamtylmady,–dedi Arshaly aýdandyq Jumyspen qamtý jáne áleýmettik baǵdarlamalar bóliminiń jetekshisi Sáýle Satybaldınova.
Oblys ákiminiń orynbasary Qanat Ydyrysov memlekettik baǵdarlamalardy úılestirý baǵytynda jumys isteıtin mamandardyń ózara tájirıbe almasýyn jolǵa qoıý qajettigine basa nazar aýdardy. Sondaı-aq, taqyryptyq semınarlardy kóbirek ótkizip, mamandardyń nátıjeli jáne sapaly jumys isteýine qajet arnaıy joba ázirleýdi tapsyrdy.
Baıqal BAIÁDIL,
«Egemen Qazaqstan»
Aqmola oblysy
