Basqarma basshysy áýeli ótken jyly jol salasynda atqarylǵan jumystarǵa toqtaldy. Byltyr bul baǵytta qazynadan 12,1 mıllıard teńge bólinse, onyń 1,8 mıllıard teńgesi respýblıkalyq, 10,3 mıllıard teńgesi jergilikti bıýdjetten qaralǵan. Bul qarjyǵa barlyǵy 532,6 shaqyrym jol kúrdeli, ortasha jóndeýlerden ótip, shaǵaldy jol salý jumystary atqarylǵan. Onyń 145,4 shaqyrymy oblystyq, 211 shaqyrymy aýdandyq mańyzy bar avtojoldar bolsa, 187,4 shaqyrymy eldi meken kósheleri bolyp tabylady. Sondaı-aq, 1 kópirdiń qurylysy júrgizilip, 2 jol ótkeli qaıta jańǵyrtylǵan. Al, «Nurly jol» memlekettik baǵdarlamasy aıasynda 3,1 mıllıard teńgege 7 joba iske asqan. Naqtylaı aıtsaq, 1 nysan jańa kópir qurylysy, 1 nysan kúrdeli jóndeý jáne 5 nysan ortasha jóndeýden ótýi josparlanǵan. Onyń 3-i byltyr paıdalanýǵa berilse, 4-i osy jylǵa ótpeli bolyp tabylǵan.
Sonymen qatar, eldi mekenderdi qoǵamdyq kólikpen qamtý máselesi tolyǵymen sheshilgen. Oblysta salynýy kózdelgen 5 avtostansııa tizilimge engizilip, belgilengen mejege qol jetkizilgen. Búginde «Sıfrly Qazaqstan» memlekettik baǵdarlamasy aıasynda ıntellektýaldy kólik júıesiniń jobalaryn iske asyrý boıynsha jol kartasy bekitilgen. Jol kartasynda qoǵamdyq kólikterde elektrondy bılettendirý júıesin engizý boıynsha tıisti sharalar aǵymdaǵy jyldyń maýsym aıynan bastap qolǵa alynatyn bolady.
Esepti jıynda oń nátıjelermen birge ózekti máseler de talqylandy. О́tken jyly turǵyndar tarapynan túsken 78 aryz-shaǵymnyń 56-sy Taraz qalasyna tıesili bolǵan. Onyń 44-i jolaýshylar kóligine, 34-i avtomobıl joldary máselerine qatysty.
О́z kezeginde ákim túsken aryz-shaǵymdarmen júıeli jumys jasaý kerektigin basa aıtyp, «Batys Qytaı-Batys Eýropa» avtojolynyń boıyndaǵy tazalyq, jolaýshylarǵa jaıly jaǵdaı jasaý jumystarynyń álsizdigin synǵa aldy. О́ńir basshysy jol belgilerin tıisinshe ornatý, jóndelgen joldyń sapalylyǵy, bekitilgen is-shara boıynsha jumystar júrgizý kerektigin de eskertti.
Hamıt ESAMAN,
«Egemen Qazaqstan»
Jambyl oblysy
