Almaty ákimdiginiń bastamasymen aıtýly kompanııa megapolıs aınalasy men almatylyq aglomerasııanyń 2030 jylǵa deıingi taý klasterin damytýdyń sheberlik-josparyn jasady. Týrızm salasyn damytý maqsatynda óńirdiń barlyq taý lokasııalary qamtylmaq. Bul tizimde aımaqtyń maqtanyshyna balanatyn Týrgen, Aq Bulaq, Oi-Qaragai Lesnaya Skazka, Tabaǵan, Býtakovka, Pıoner, Kókjaılaý, Shymbulaq, Qaskeleń bar.
Sheberlik-jospar aıasynda 470 km soqpa jáne 85 km velosıped joldaryn, 45 km atpen júrý baǵyttaryn, 250 km shańǵy trassalaryn damytý jaıy kózdelgen.
Almaty ákimi Baýyrjan Baıbek jumys sapary kezinde Almaty oblysy ákimdiginiń basshylyǵymen birge kóshpeli jıyn ótkizip, óńirdiń barlyq taý lokasııalaryn aralady.
Shahar basshysy taý aýmaǵynda qojetimdi sporttyq-otbasylyq kýrort uıymdastyrý úshin «SSKA» taý shańǵysy bazasyn qalanyń kommýnaldyq menshigine berý máselesin qarastyrýdy tapsyrdy.
Bulardan ózge, taý týrızimin damytý maqsatynda «Pıoner», «Oi-Qaragai Lesnaya Skazka» taý kýrorttaryna deıin qala mańyndaǵy eldi mekenderden arnaıy avtobýstar qatynaıtyn bolady. Jańa avtobýs baǵyttary aptasyna úsh ret (Juma – Senbi – Jeksenbi) 2-3 saǵattyq ıntervalmen qatynaıtyn bolady.
Taý klasterin damytý týraly sheberlik-josparyn jasaý jónindegi memorandýmǵa qol qoıýǵa Almaty qalasy men Almaty oblysynyń ákimdikteri, Ile-Alataý ulttyq parki, «Qazaq týrızm» jáne «Master Concept» kompanııalary qatysty. Sheberlik-josparynyń konsepsııasyn talqylaý tobyna memlekettik organdardyń, týrızm salasyndaǵy halyqaralyq kompanııalardyń, qoǵamdyq qorlardyń, týrıstik assosıasııalardyń, joǵary oqý oryndarynyń, sporttyq týrızm federasııasynyń ókilderi enip otyr.
Arman OKTIаBR,
«Egemen Qazaqstan»
ALMATY
