– Prezıdenttiń tapsyrmasy boıynsha oblysymyzdaǵy ınternattardyń barlyǵyn qalpyna keltirdik. Olar kópten beri jóndeýdi qajet etken bolatyn, sondyqtan biz birinshi kezekte osy máselege kóńil aýdardyq, – dedi E.Qoshanov.
Qaraǵandy oblysynda orta mektepter janynda barlyǵy 21 ınternat jumys isteıdi. Búgingi kúnde olardyń 12-si kúrdeli jóndeýden, qalǵany aǵymdaǵy jóndeýden ótken.
Osakarov aýdanynda bolǵanynda oblys basshysy №12 jalpy bilim berý mektebiniń janyndaǵy ınternattyń tynys-tirligimen tanysty. Osydan bir jyl buryn apattyq jaǵdaıda bolǵan mekemege qazir 114 mln teńgeniń jóndeý jumystary júrgizilgen. Bul qarajat shatyrdy tolyǵymen aýystyrýǵa, elektr, jylý júıelerin, santehnıkany, esikterdi jańartyp, energııa únemdeıtin plastık terezelerdi ornatyp, satylardy jóndep, kireberisti qalpyna keltirýge, sondaı-aq as úı, demalys bólmelerine jáne oqýshylar turatyn jatyn bólmelerge jıhaz alýǵa tolyǵymen jetipti.
– Bul jerde meniń úsh balam turyp jatyr. Qazir kóńilimde alań joq, sebebi munda úıdegideı jaǵdaı jasalǵan. Ǵımarat jaıly jáne jyly. О́skeleń urpaqqa úlken kóńil bólip jatqany úshin Prezıdentimizge alǵysymdy bildiremin, – deıdi ınternat oqýshysynyń anasy Oksana Kovaleva aǵynan jarylyp.
Qaırat ÁBILDA,
«Egemen Qazaqstan»
Qaraǵandy oblysy
