Zertteý áleýmettik saýalnama negizinde júrgizilgen-di. Respondentterdiń jasy boıynsha, alkogoldi tutynýǵa degen kózqarasy men alkogoldi paıdalanýǵa qarsy kúrestiń tıimdiligi týraly saýal tastaldy.
Zertteý isine Almaty qalasynyń ALMAU ýnıversıtetiniń birinshi kýrsynyń 43 stýdenti belsene qatysyp, UIB, QBTÝ, KIMEP, Narhoz, AEBÝ, QazUÝ, QazMÝI, Turan ýnıversıtetteriniń stýdentteri arasynda saýalnama júrgizildi.
Barlyǵy saýalnamaǵa18 jastan 25 jasqa deıingi 773 respondent qatysty. Olardyń 388-i er adam jáne 385-i áıelder qaýymynan quraldy. Respondentterdiń 38% alkogoldi alǵash ret 16 jasta, al 37%-y alǵash ret 16-18 jas aralyǵynda paıdalanǵandaryn jetkizdi. Sonymen qatar, 20% -y 18-den 21 jasqa deıin paıdalansa, tek 5% ǵana 21 jastan asqan jastar bolyp shyqty.
Sondaı aq, respondentterdiń 41% -y alǵash ret dostarymen birge ishimdik ishkenin kórsetti. 31%-y bolsa úıde, ata-analarymen nemese týystarymen birge paıdalanyp, 17%-i dámhana nemese barda, al 11%-i alkogoldi tek kóshede paıdalanatyndaryn jetkizdi.
Saýalnamaǵa qatysqandardyń 5%-y ishimdikterdi táýlik boıy ishetinderin moıyndasa, 15%-y aptasyna bir nemese eki ret paıdalanatyndaryn, al 29% – aıyna birneshe ret qabyldaıtyndaryn jetkizdi. Respondentterdiń taǵy 29%-y saýyq saıran men mereke kúnderinde ǵana ishimdik ishetinin atap kórsetti. Al 22% -y ishimdikti jylyna bir nemese eki ret ǵana satyp alyp, sırek ishetinderin jasyrmaıdy.
Alkogoldi tutynýdyń taralý sebebin surastyrǵanda stýdentter: 43% – alkogolge qoljetimdiliktiń ońaı ekendigin, 37,7% – dostar men qorshaǵan ortanyń yqpalyn, 26% – eresekterdiń úlgisin, 22% – ómirde basqa maqsat-múddeleriniń joqtyǵyn, 21,35% – alkogol qaýpi týraly aqparattyń azdyǵyn, 22,5%-y kúndelikti kezdesetin janjaldar men kúızeliske túsýdi alǵa tartady.
Aınash ESALI,
«Egemen Qazaqstan»
ALMATY
