Altynaı apa áıgili Mataı stansasynda týyp-ósti. Bul stansany áıgili dep ataýymyzdyń syry bar, Ekinshi dúnıejúzilik soǵys jyldarynda Mataıdyń deposynda orys ónertapqyshy Mıhaıl Kalashnıkov alǵashqy atys qarýyn oılap taýyp, qurastyrǵan bolatyn. Túrksib temir jolynyń negizgi bólimi retinde shaǵyn stansada tirshilik kórigi sýyǵan emes. Ásirese, soǵys jyldarynda Orta Azııadan maıdan shebine attanǵan sostavtar leginde san joq edi. Jastaıynan temirjoldyń tarsyly men parovozdyń ashy daýsyna qulaǵynyń quryshy qanǵan Altynaı Esbolatova on toǵyz jasynda mashınıstiń qysqa merzimdi oqýyn oqyp, paravozdyń basqarý tizginin qolyna aldy. Osylaısha, áskerı poıyzdyń mashınısi atanǵan qazaqtyń jas qyzy aýyr sostavty súıregen paravozdyń kabınasynda alǵy shepke kete bardy. Stalıngrad túbindegi maıdanǵa áskerı tehnıka, adam kúshi, azyq-túlik jetkizip, keri oralǵanda aýyr jaralanǵan jaýyngerlerdi tasıtyn edi.
Qazir «Parovoz apa» Taldyqorǵan qalasynda turady. Tek ol kúnder týraly áńgimege qasań. Jalynǵa oranǵan jastyǵy men el kúızelgen kezeńdi esine túsirýden boı tartatyn bolar. Esesine búgingi baqytty urpaqqa únemi bata berip, táýelsiz eldiń tileýin tilep otyrady.
...Altynaı apamen jolyǵýǵa «Qarttar kúni» qarsańynda barǵan edik. Izimizdi ala bir top oqýshy da «Parovoz apany» quttyqtap kele qalypty. Apa balalarǵa batasyn berdi.
– Jaqsy oqyńdar, tárbıeli bolyńdar, ata-analaryńnyń qýanyshy, Otannyń tiregi bolyńdar. Bilim – barlyq ıgiliktiń kilti. Balalardyń biz kórgen qıyndyqty kórmeı, bolashaqtary jarqyn bolýyn tileımin! – dedi ardager.
Qalmahanbet MUQAMETQALI,
«Egemen Qazaqstan»
Almaty oblysy
