Medısına • 22 Qańtar, 2019

Oralda onkolog dárigerler qaýipti derttiń qaterin eskertti

242 ret kórsetildi

Qazaqstanda 21-29 qańtar aralyǵynda jatyr moıny qaterli isigi derti týraly halyqty aqparattandyrý aptalyǵy ótip jatyr. Bul búkil dúnıejúzinde jyl saıyn ótkiziletin shara.

Oral qalasynda Batys Qazaqstan oblystyq onkologııalyq dıspanseri mamandary uıymdastyrǵan baspasóz máslıhatynda BQO densaýlyq saqtaý basqarmasynyń qoǵamdyq densaýlyq saqtaý bólimi jetekshisi Aıgúl Baıbatchaeva kirispe sóz sóılep, ǵasyr dertine aınalǵan syrqat máselesine jurtshylyq nazaryn aýdarýdyń mańyzdylyǵyn atap ótti. Dárigerler bul derttiń aldyn alý, kúresý joldary bar ekendigin, tegin memlekettik baǵdarlama júzege asyrylyp jatqanyn aıtady. Qaterli dertpen kúres joldary jyl saıyn damyp keledi, mamandardyń da kásibı biliktiligi joǵary.

- Bul derttiń aldyn alýdyń barlyq quraly qolymyzda, eń bastysy – bul kúreske áıelderdiń ózi atsalysýy, óziniń jáne jaqyn jandarynyń densaýlyǵyn aldyn ala oılaýy kerek! «Aýyryp em izdegenshe, aýyrmaıtyn jol izde!» degen ǵoı. Boıyńyzdan aýyr derttiń esh belgisi bilinbese de aldyn ala tekserilip, qaýiptiń aldyn alýdyń mańyzy óte zor» - deıdi Aıgúl Máýletbekqyzy.

Aldyn ala jasalǵan skrınıng arqyly denedegi derttiń 80%-nyń aldyn alýǵa bolatyny medısınada áldeqashan dáleldengen. Buǵan qosa búginde onkogendik juqpa qaýpiniń betin qaıtaratyn tıimdiligi joǵary ekpeler paıda boldy. Eń bastysy, profılaktıkalyq qadaǵalaý arqyly jatyr moıny qaterli isiginiń aldyn alýǵa bolady, Adam papıllomasy vırýsyna (APV) qarsy vaksınanyń da kómegi zor. «Sondyqtan 25 jasqa deıingi áıelderge jasalǵan ekpe kóp qaýiptiń aldyn alady» deıdi mamandar.

Jatyr moıny qaterli isigi – álem boıynsha áıelder arasynda keń taralǵan obyr dertiniń arasynda ekinshi orynda tur eken. Jyl saıyn bul dertpen 0,5 mln áıel aýyryp, onyń 288 myńy osy aýrýdan óledi. Bul syrqatqa negizinen 30-40 jastaǵy áıelder shalynatyndyqtan, jatyr moıny qaterli isiginiń qoǵamǵa tıgizetin zardaby orasan.

Batys Qazaqstan oblystyq onkologııa dıspanseri dırektorynyń medısınalyq bólim boıynsha orynbasary Nurlan Tólemisov Aq Jaıyq óńirinde jyl saıyn osy dertke shaldyqqan 80-90 áıel anyqtalatynyn aıtady. Damyǵan elderde júıeli ótkizilip turatyn skrınıng sharalary nátıjesinde aty jaman dertke shaldyǵý oqıǵasy eki esege azaıatynyn tájirıbe kórsetip otyr.

Oralda ótken jıynda gınekolog-dáriger Asylzat Jaqypova jatyr moıny qaterli isigin anyqtaý jáne emdeý joldary týraly, Batys Qazaqstan oblystyq onkologııa dıspanseri sıtologııa bóliminiń meńgerýshisi Laýra Iаkýpova osy dertti anyqtaýdyń sıtologııalyq skrınıng ádisi jóninde baıandama jasady. Túrli saýaldarǵamamandar tarapynan jaýap berildi.

Qazbek QUTTYMURATULY,

«Egemen Qazaqstan»

Batys Qazaqstan

Sońǵy jańalyqtar

Shyǵysqa qar tústi

Aımaqtar • Búgin, 22:57

Murat Áıtenov chempıondardy marapattady

Aımaqtar • Búgin, 21:48

Durys saqtaı almaǵannyń qarýy alyndy

Aımaqtar • Búgin, 18:50

Nur-Sultanda eki bazar salynady

Elorda • Búgin, 16:54

Uqsas jańalyqtar