Parlament • 22 Qańtar, 2019

Senat komıtetinde «Kaspıı teńiziniń quqyqtyq mártebesi týraly konvensııany ratıfıkasııalaý týraly» zań jobasy qaraldy

345 retkórsetildi

Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Kaspıı teńiziniń quqyqtyq mártebesi týraly konvensııany ratıfıkasııalaý týraly» zań jobasy qaraldy. Bul týraly Parlament Senatynyń baspasóz qyzmeti habarlady. 

Konvensııaǵa 2018 jylǵy 12 tamyzda Aqtaý qalasynda ótken besinshi Kaspıı sammıtiniń barysynda Qazaqstan, Ázerbaıjan, Iran, Reseı jáne Túrikmenstan prezıdentteri qol qoıǵan bolatyn. 

Konvensııanyń maqsaty - Kaspıı teńizin, onyń sýyn, túbin, qoınaýyn, tabıǵı resýrstary men teńiz ústindegi áýe keńistigin paıdalanýǵa qatysty taraptardyń quqyqtary men mindetterin aıqyndaý jáne retteý.

Konvensııa Kaspıı teńizindegi ulttyq aımaqtardyń, ıýrıdıksııasy men egemendiktiń arajigin ajyratý, qoınaýyn paıdalaný, tranzıt jáne tasymaldaý, sý asty turba qubyrlary men baılanys jelilerin júrgizý quqyqtaryn, tabıǵı ortasy men bıologııalyq resýrstaryn qorǵaýǵa baılanysty máselelerdi retteıdi. Qazirgi zamanǵy qaýipter men qaterlerge qarsy turý, tótenshe jaǵdaılardy eskertý jáne joıý, Kaspıı mańy elderiniń áskerı qyzmeti turǵysynda qaýipsizdik máselelerine derbes nazar aýdaryldy.

Konvensııaǵa sáıkes, Kaspıı teńiziniń aıdyny túrli tártiptegi aımaqtarǵa bólinedi. Taraptar syrtqy shekarasy memlekettik shekara mártebesine ıe 15 teńiz mılinen aspaıtyn kólemde aýmaqtyq sýdy bekitti. Aýmaqtyq sýlarǵa ár memleket tek kásip etý quqyǵyna ıe on mıldik balyq aýlaý aımaǵy shektesetin bolady.

Konvensııa depozıtarııi bolyp tabylatyn Qazaqstan Respýblıkasy besinshi ratıfıkaııalyq gramotany alǵan kúnnen bastap kúshine enedi.

Komıtet otyrysynda sondaı-aq «Eýrazııalyq ekonomıkalyq odaqtyń úshinshi memlekettermen, halyqaralyq uıymdarmen nemese halyqaralyq ıntegrasııalyq birlestiktermen halyqaralyq sharttary týraly kelisimdi ratıfıkasııalaý týraly» zań jobasy qaraldy.

Kelisimge 2018 jylǵy 14 mamyrda Sochıde Eýrazııalyq ekonomıkalyq odaqqa múshe memleketterdiń basshylary qol qoıǵan.

Qujat Eýrazııalyq ekonomıkalyq odaqqa kirmeıtin eldermen halyqaralyq sharttardy jasasý, olardyń qoldanysyn toqtatý jáne toqtata turý tártibin retteıdi. Kelisimde úshinshi eldermen kelissózder júrgizý rásimi, kelissóz delegasııasy basshysynyń ókilettikteri men mindettemeleri, kelissóz ustanymyn qamtıtyn jáne úshinshi tarapqa beriletin qujattardyń jobalaryn múshe memlekettermen mindetti kelisý rettelgen.

Sonymen qatar Kelisimde halyqaralyq sharttar jobalaryna ekonomıkalyq ıntegrasııa sheńberinen shyǵatyn erejelerdi engizýge jol bermeý maqsatynda Odaq pen oǵan múshe memleketter atynan áreket etetin kelissózder júrgizetin toptardyń qyzmetin baqylaý tetikteri kózdelgen.

Odaq atynan halyqaralyq shartqa qol qoıý múshe memleketter halyqaralyq shart jobasyna qatysty tıisti memleketishilik rásimderdi oryndaǵannan keıin Joǵary keńestiń sheshimi negizinde júzege asyrylady.

Zań jobalary Senattyń qaraýyna jiberildi.

Sońǵy jańalyqtar

Uqsas jańalyqtar