Bilim jáne ǵylym mınıstri E. Saǵadıevtiń, eńbek jáne halyqty áleýmettik qorǵaý mınıstri M. Ábilqasymovanyń, energetıka mınıstri Q. Bozymbaevtyń, ulttyq ekonomıka birinshi vıse-mınıstri R. Dálenovtyń jáne aýyl sharýashylyǵy birinshi vıse-mınıstri A. Evnıevtiń, sondaı-aq, Shyǵys Qazaqstan oblysynyń ákimi D. Ahmetovtyń, Astana qalasynyń ákimi B. Sultanovtyń, Shymkent qalasynyń ákimi Ǵ. Ábdirahymovtyń baıandamalaryn tyńdaǵannan keıin Premer-Mınıstr Prezıdenttiń bes áleýmettik bastamasy — bul Memleket basshysynyń aýqymdy baǵdarlamasy, onyń ár adamnyń ómirine áseri bar ekenin atap ótti. Sondyqtan árbir bastamany sapaly júzege asyrý qajet.
Birinshi bastama boıynsha jumysty jalǵastyrý qajet, sondaı-aq Ulttyq banktiń otyrysta aıtylǵan usynystaryn qarastyrý kerek. Bıyl «7–20–25» baǵdarlamasynyń qazirgi kedergilerin joıyp, iske asyrý barysyn jedeldetý qajet.
Salyq júktemesin azaıtýǵa qatysty ekinshi bastama oryndaldy.
Úshinshi bastama qosymsha bilim granttaryn berý turǵysynan oryndaldy. Endi jataqhanalar salý máselesi qaldy. QR BǴM derekterine sáıkes, bıyl alǵashqy jataqhanalar salynady. Premer-Mınıstr bıyl josparlanǵan 5 myń oryndy paıdalanýǵa berý qajet ekenin aıtty. Budan ózge, Bilim jáne ǵylym mınıstrligine ákimdiktermen birlesip, otyrys barysynda aıtylǵan usynystardy pysyqtaý tapsyryldy.
Tórtinshi bastamaǵa qatysty, shaǵyn nesıeler boıynsha josparly kórsetkishterge qol jetkizý qajettigi atalyp ótti. Sonymen qatar, atalǵan máseleniń, ásirese qalalarda, oryndalý sapasyn arttyrýǵa erekshe kóńil bólý kerek. Ulttyq ekonomıka, eńbek jáne halyqty áleýmettik qorǵaý mınıstrlikteri tarapynan úılestirý jumystaryn kúsheıtý tapsyryldy. Budan ózge, óńirlerde berilgen shaǵyn nesıelerdiń ıgerilýin qamtamasyz etý maqsatynda sebepterin taldap, kedergilerdi joıý tapsyryldy. Atalǵan máselede baǵdarlamaǵa «Bıznes-Bastaý» jobasynyń túlekterin tartý turǵysynan «Atameken» ulttyq kásipkerler palatasynyń erekshe róli atalyp ótti.
Besinshi baǵytty oryndaý turǵysynan «Saryarqa» gaz qubyryn ýaqytyly salyp, iske qosýdy qamtamasyz etý qajet. Energetıka mınıstri Q. Bozymbaevqa bul máseleni erekshe baqylaýda ustaý tapsyryldy.
