Esterińizge salar bolsaq, qala ákimi Ǵabıdolla Ábdirahymov 2016 jyldyń naýryzynda ótken baspasóz máslıhatynda 2018 jylǵa deıin Shymkentte úsh aýysymdaǵy mektepterdiń máselesi tolyq sheshiledi dep sendirgen bolatyn.
«Mektep tapshylyǵyn boldyrmaýdyń birden-bir joly jyl saıyn 5-6 jańa mektep salý. Tipti, Bilim jáne ǵylym mınıstrliginiń arnaıy tapsyrmasyna sáıkes mektepterdiń janynan qosymsha oqý korpýstary retinde ǵımarattar salýymyzǵa bolady» degen edi ótken jylǵy Tamyz keńesinde.
«Shymkent qalasynda bala týý kórsetkishi joǵary bolǵandyqtan birinshi synypqa baratyn balalardyń sany rekordtyq kórsetkish qurap otyr» degen áńgimeler aıtylýda. Degenmen, memlekettik baǵdarlama aıasynda salynyp jatqan bilim berý mekemeleri sol qajettilikti qamtamasyz ete almaı ma?
Máselen, shahardyń qaq ortasyndaǵy «Nursát» móltekaýdanynda 2007 jyly paıdalanýǵa berilgen №80 mektep-lıseıine bir synypta ortasha eseppen 30 oqýshy bilim alýda. 2018 jyldyń qyrkúıeginde 1-synyp tabaldyryǵyn attaǵan bala sanynyń ózi – 530. Bul másele týraly bilim basqarmasynyń jaýapty tulǵalary basqarma tarapynan mektepke jaqyn mańnan ǵımarat jalǵa alynǵanyn tilge tıek etedi.
Shymkent qalasyndaǵy úsh aýysymdy mektep máselesi jalǵa ǵımarat alýmen sheshilip ketpeıtini belgili. Shymshaharda jaǵdaıy dál osyndaı 19 bilim ordasy bar. Sandardy tizbekter bolsaq, kúzgi oqý jylynda qaladaǵy №1 mektep-gımnazııada 591 bala alǵashqy álippemen tanysqan. О́kinishtisi, 1100 oryndy mektepte búgingi tańda 4238 oqýshy sabaq oqyp júr. Demek, bir synypta 50-ge tarta bala bolsa, bir muǵalim 2 synypqa jaýapty degen sóz.
Shymshahardaǵy 15 shaqty mektepte synyp jetispeý jaǵdaıy baıqalady. Al qosymsha qurylys jumystaryn júrgizýge ázirge jer telimi berilmeı jatqandyǵyn alǵa tartady sala jaýaptylary.
Elbasy el halqyna Joldaýynda óskeleń urpaqtyń sapaly bilim alýy úshin qazynadan mektepterdiń qurylysyna 50 mlrd teńge qarjy jumsalyp, apatty jaǵdaıdaǵy jáne úsh aýysymdy bilim ordalarynyń máselesi birjola sheshiletindigin jetkizgen edi.
Al, ázirge Shymqalada smetalyq qujaty eseptelip, jýyq arada qurylysy aıaqtalyp, jas urpaqtyń bilim alýyna beriledi degen bilim oshaqtary saýsaqpen sanarlyq.
Aıta keterligi, sońǵy jyldary qalaǵa kelgen basshylardyń naqty atqarǵan jumysynan bergen ýádeleri kópteý bolyp tur. Byltyr Shymkent qalasynyń eks-ákimi Nurlan Saýranbaev halyq aldyndaǵy esepti kezdesýde Shymkenttegi úsh aýysymdy mektepterdiń máselesi jyl sońyna deıin sheshiledi dep sendirgen bolatyn.
«2017 jyly kópten beri alǵash ret qalada 124 mektepti jóndeýge jáne úsh mektepti kúrdeli jóndeýge qarajat bólindi. Barlyq jumystar tolyǵymen aıaqtaldy. Alty mektep jáne 4 qosymsha ǵımarat paıdalanýǵa berildi. Taǵy da jańa bes mekteptiń qurylysy men tórt qosymsha ǵımarat salý jumystary bastaldy. Qurylysty 2018 jyly aıaqtaý josparlanýda» degen edi óz sózinde N.Saýranbaev.
Jýyrda ǵana Shymkent qalasyna qarasty aýdan ákimderiniń qutpan jylyn qorytyndylaǵan esepti kezdesýinde bilim salasyna baılanysty turǵyndardyń suraǵyna shahar basshysy ekiushty jaýap aıtqany el esinde.
Abaı aýdanynyń ákimi Buqarbaı Parmanovtyń halyq aldyndaǵy jyldyq esebinde qala ákimi Ábdirahymov qurylysy 2012 jyly bastalyp, 2013 jyly tamyz aıynda qoldanysqa berilgen T.Tájibaev atyndaǵy №81 jalpy orta mektebin biz soǵyp berdik dep jańylǵan bolatyn.
Bir sózben aıtqanda, qaladaǵy bilim oshaqtaryndaǵy synyp jetispeý máselesi - aldaǵy ýaqytta kezek kúttirmeıtin máseleniń biri. Sebebi, eldiń erteńi jas urpaqtyń sapaly bilim alýyna tikeleı qatysty máseleni keıinge shegerýdiń saldary ońaı bolmasy anyq.
Nurshat TО́KEN,
«Egemen Qazaqstan»
