Insýltqa ushyraǵan aýrýlar, onkologııanyń 4 jáne 3-inshi stadııasyndaǵy syrqattar óte kóp. Biraq, «Hospıste» Semeı qalasy boıynsha nebári 30 tósektik oryn bar. Sol 30 oryn da tolyp ketken. Hospıs-Irlandııa eliniń qarjylaı kómegi arqyly turǵyzylǵan aýrýhana. Aıta ketý kerek, úkimetimiz sońǵy kezde medısına salasyn irgeli damytyp otyr. Eger 2010 jyldyń bıýdjeti men qazirgi bıýdjetti salystyrsa aıyrmasy jer men kókteı.
- Oblystyq ákimdik tarapynan Semeıdiń medısına salasyna kóńil bólý joǵary deńgeıde, aýrýhanalar jańa tehnologııalarmen jabdyqtalǵan, - dedi Ǵalııa Jýasbaeva, - desek te, men osy Hospıske jumysqa kirgen kezde mundaı jaǵdaı basqasha ekenin kórdim. Bizge tósek tartyp jatqan aýrý adamdar túsedi. Sondaı adamdardy jaqyndary aýdaryp, tóńkerip, tazalap, jaǵdaı jasamaǵanyn baıqaımyz. Iаǵnı turǵyndar, aýrý adamdy úıde qalaı kútý kerek degen máseleden beıhabar bolyp otyr. Bizge kep túsken naýqastyń mundaı jaǵdaıda qalypqa kelýi óte qıyn. Eger biz jylyna 240-250 naýqas qabyldasaq, onyń 60-tan astamy qaıtys bolady. Eki ne tórt bólmeli úıi bar adamdardyń bir týysy aýyryp alsa, bir bólme tolyqtaı naýqasqa beriledi. Balasy bar úılerde bul qıyn. Onda aýyryp jatqan adamda múgedektik bolmasa, sol adamǵa qajetti gıgıenalyq pampers sııaqty quraldardy aqshaǵa satyp alýǵa týra keledi. Máselen, bizde bir zeınetker ata bar. Báıbishesiniń kózi kórmeıdi, uzaq jyldan beri tósek tartyp jatyr. Múgedektigi joq bolǵandyqtan oǵan bárin satyp áperýge týra keledi. Sol aqsaqal óziniń zeınetaqysyna kıindiredi, dárisin áperedi, tamaǵyn áperedi. Men osyndaı adamdarǵa tegin kómekter bolsa dep biraz jerge shyqtym. Biraq zań boıynsha múgedektigi bar adamdarǵa ǵana dári-dármek, taǵy biraz jeńildik bar eken.
Ǵalııa Jýasbaevanyń aıtýynsha, jaqynda ǵana Densaýlyq saqtaý mınıstrligimen selektorlyq keńes ótken. Onda elimizde pallıatıvti kómek berýdi jolǵa qoıý týraly aıtylypty. «Nur Otan» partııasynyń Semeı qalalyq fılıalynda ótken dóńgelek ústel barysynda «Hospıs» aýrýhanasynyń bas dárigeri Ǵalııa Jýasbaeva partııalyqtardan kómek surap, kóptegen jaǵdaıdyń basyn ashyp aıtty. Semeıde de pallıatıvti medısınany jáne «Úıdegi Hospıs» jobasyn qolǵa alýdyń mańyzdylyǵyna toqtaldy. Sebebi aýrýhanadaǵy 30 oryn áldeqaıda az bolyp tur.
Raýshan QABJANQYZY
«Egemen Qazaqstan»
Semeı
