G.Ábdiqalyqova kezdesý barysynda Qazaqstan men Armenııany tarıhı jáne mádenı qarym-qatynastar tyǵyz baılanystyratynyn atap ótti. Onyń ishinde jemisti yntymaqtastyq EýrAzEQ, UQShU, TMD jáne basqa da ıntegrasııalyq birlestikter aıasynda júzege asyp keledi.
Memlekettik hatshy elshini Qazaqstandaǵy qyzmetine taǵaıyndalýymen jáne Armenııadaǵy parlamenttik saılaýdyń ótýimen quttyqtap, jańadan saılanǵan zań shyǵarýshy organnyń belsendi qyzmeti Qazaqstan-Armenııa seriktestiginiń odan ári nyǵaıa túsýine oń yqpal etetinine senim bildirdi.
G.Ábdiqalyqova eki eldiń eýrazııalyq ıntegrasııa aıasyndaǵy ózara is-áreketi taýar aınalymynyń ósý qarqynyna septigin tıgizip otyrǵanyn aıtty. 2018 jylǵy 10 aıdyń qorytyndysy boıynsha, Qazaqstan men Armenııa arasyndaǵy taýar aınalymy 10,4 mln AQSh dollaryn qurap, 2017 jylmen salystyrǵandaǵy ósim 19,5 paıyzǵa jetken. Onyń ishinde eksporttyń úlesi 4,9 mln dollar bolsa, ımport 5,5 mln dollardy quraǵan.
– Bizdiń mádenı-gýmanıtarlyq yntymaqtastyǵymyzdyń Qazaqstan men Armenııa qarym-qatynasynda erekshe mańyzy bar. Turaqty túrde mádenı, ǵylymı jáne sporttyq is-sharalar ótkizilip, jastar men bilim mekemeleri arasynda tyǵyz baılanys jolǵa qoıylýda. Qazaqstanda turyp jatqan armıan dıasporasy – bizdiń mádenı-gýmanıtarlyq qatynasymyzdyń mańyzdy dánekeri, – deı kele, Memlekettik hatshy elimizdiń árbir oblys ortalyǵynda Armıan ulttyq-mádenı birlestikteriniń tabysty jumys istep jatqandyǵyn atap ótti.
Kezdesý sońynda Memlekettik hatshy Gúlshara Ábdiqalyqova Armenııanyń Tótenshe jáne ókiletti elshisi Gagık Galachıanǵa ekijaqty ózara árekettestikti odan ári nyǵaıtý isinde tabys tiledi.
G.Galachıan bul qyzmetine ótken jyldyń qarasha aıynda Armenııa prezıdentiniń jarlyǵymen taǵaıyndalǵan bolatyn.
Serik ÁBDIBEK,
«Egemen Qazaqstan»
