Agenttiktiń aýmaqtyq departamentiniń basshysy arnaıy monıtorıng tobynyń maqsaty men mindetteri, top erejesiniń talaptarymen, 2019 jylǵa arnalǵan jumys josparynyń jobasymen tanystyryp ótti.
Budan basqa aýmaqtyq departament basshysy byltyrǵy jyldyń jumys qorytyndysy men nátıjelerine toqtalyp ótip, aldaǵy ýaqyttaǵy qoǵamdyq monıtorıng ótkiziletin salalardy belgiledi.
О́z kezeginde oblystyq arnaıy monıtorıng tobynyń tóraıymy Rýhııa Aldońǵarova 2018 jyly atqarylǵan jumystardy aıta otyryp, negizgi qol jetkizgen nátıjelerdi aıtyp ótti. Atap aıtqanda, óńirdegi densaýlyq saqtaý mekemelerine júrgizilgen monıtorıng barysynda Aqtaý jáne Jańaózen qalalaryndaǵy emdeý mekemelerinde birqatar kemshilikter anyqtalyp, oblys ákiminiń qatysýymen ótken oblystyq alqa otyrysynda jurtshylyqtyń nazaryna jetkizildi. Nátıjesi boıynsha oblystyq densaýlyq saqtaý basqarmasyna tıisti tapsyrmalar berildi.
Jıynda sonymen birge óńirdegi oqý oryndaryna qarasty stýdenttik jataqhanalarǵa júrgizilgen baqylaý jumystarynyń nátıjesi sóz boldy. Iаǵnı, qoǵam belsendileriniń anyqtaǵanyndaı, jataqhanalarda jóndeý jumystaryn aıtpaǵanda, stýdentterge tıisti bólmelerde shetel azamattary da zańsyz turyp jatqandyǵy anyqtaldy. Qazirgi tańda stýdenttik jataqhanalarda anyqtalǵan kemshilikterdi joıý boıynsha bilim berý uıymdarymen tıisti sharalar qolǵa alyndy.
Elimizdiń aqparattyq keńistiginde biraz rezonans týdyrǵan «Qazaqstan Temir Joly» AQ óńirlik bólimshelerine qatysty qoǵamdyq monıtorıng nátıjeleri de nazardan tys qalǵan joq. Qoǵam belsendileri men blogerler Mańǵystaý oblysyna qarasty temirjol vokzalynda baqylaý júrgizý barysynda vokzal qyzmetkerlerimen jolaýshylar poıyzyna bıletterdiń jetispeýshiligin qoldan jasap, adamdarǵa qıynshylyq týdyryp, sol arqyly jolaýshylar bıletterin ústeme aqysymen qoldan satý, sondaı-aq bıletsiz jolaýshylardan zańsyz túrde aqy alý sııaqty derekterdiń júıeli túrde oryn alyp otyrǵandyǵy anyqtaldy.
Arnaıy monıtorıng tobynyń júrgizgen reıdtik sharalary nátıjesinde tıisti usynymdar berilip, «Qazaqstan Temir Joly» aksıonerlik qoǵamymen aldaǵy ýaqytta «Mańǵystaý» stansasynan qatynaıtyn jolaýshylar poıyzdaryna jańa vagondar beriletin bolady.
Arnaıy monıtorıng tobynyń músheleri buqaralyq aqparat quraldarynda nemese áleýmettik jelilerde turǵyndardyń tarapynan kóterilgen máselelerge jedel túrde áreket etip, tıisti memlekettik organdarǵa habarlaý tájirıbesin jalǵastyryp, kúsheıtý qajettigin usyndy. Qoǵam ókilderiniń pikirinshe, turǵyndarmen keri baılanys mehanızmderin jetildirýde arnaıy monıtorıng tobynyń áleýeti zor bolmaq.
Jıyndy qorytyndylaı kele, aýmaqtyq departament basshysy N.Jannazarova 2019 jylǵa arnalǵan arnaıy monıtorıng tobynyń qoǵamdyq baqylaý júrgiziletin salalar boıynsha usynystaryn qabyldap, oblys, qala top quramyn jańartý, áleýmettik jeliler men BAQ betindegi qoǵamdy tolǵandyrǵan máselelerdi konstrýktıvti, zań talaptaryna sáıkes sheshý qajettigin basa aıtyp, monıtorıng tobynyń atyna kir keltirmeı, Agenttiktiń aýmaqtyq departamentimen birlesip qoǵam ıgiligi úshin jumys jasaýǵa shaqyrdy.
Gúlaıym ShYNTEMIRQYZY,
«Egemen Qazagstan»
Mańǵystaý oblysy
