Kókshetaý qalasynda turatyn Elena Samsonova san alýan hosh ıisti sabyndy 10 jyldan beri jasaıdy eken. Negizgi mamandyǵy – psıholog. Alaıda, maqsat etken isinen murat tabatynyna kózi jetken soń osy kásipke kóńili qulaǵan.
– Bári bala kútimine oraı demalysqa shyqqan sátimnen bastaldy,– deıdi Elena Samsonova. – Áýeli sabyn daıyndaý tásilderin ǵalamtordan izdep taptym. Birden kóńilim aýǵan soń, indete zerttedim.
Jańa kásip qyzyqty bolyp kóringen. Qoly jattyǵa kele ıis sabyndardy ártúrli etip qalyptap, qıly pishinde jasaıtyn boldy. Jasaǵan zatyńnyń syrtqy keıpi de jutynyp turýy kerek qoı.
– Túrli-tústi boıaý, ıistendirgish qajet, – deıdi sheber. – Sapasy da jaman emes, eshbir hımııa joq. Negizgi shıkizatyn Reseıden aldyramyn.
Sórede turǵan sabyndar sabyn emes, san alýan oıynshyq tárizdi. Myna bireýi qorbıǵan qonjyq, súp-súıkimdi kúshik, tipti jemis-jıdekter beınesindegileri de tolyp jatyr.
– Elena bul tóńirektegi qoldan sabyn jasaıtyndardyń tuńǵyshy, – deıdi «Palıtra Sınegorıa» birlestiginiń jetekshisi Elena Andronıak. – О́zimniń de kishkentaıym bar. Balalardy oıynshyq sabynmen jýyndyrý sondaı ońaı, olar úshin bul qyzyq. Tipti úlkenderdiń ózin eliktiredi.
Baıqal BAIÁDIL,
«Egemen Qazaqstan»
Aqmola oblysy
