«Men úlken senimmen armandar oryndalady degim keledi. Elbasynyń aldynda sóz sóıleý meniń bala kúngi armanym bolatyn. Bul maqsatqa jetý, árıne, ońaıǵa túspedi. Memleket basshysynyń aldynda sóz sóıleý úshin kóptegen jetistikke jetip, bıik belesterdi baǵyndyrý kerek. Qazir jastarǵa erekshe kóńil bólinip jatyr. Memlekettiń bul qoldaýy biz úshin úlken baqyt» dedi ol.
Sondaı-aq Rasýl Abdýllaev óz jumysynyń nátıjesimen bólisip, memleket damýyna úles qosatyn Marketıng mınıstrligi atty jańa jobasyn usyndy.
«Bul - Qazaqstandy álemdik arenaǵa shyǵarý úshin taptyrmas joba bolmaq. Sondaı-aq bul eldegi barlyq vedomstvolardyń jumysynyń alǵa basýyna úles qosatyn arnaıy platformaǵa aınalady. «Rýhanı jańǵyrý» sekildi ıdeologııalyq baǵdarlamalardyń mańyzyn tek qana eldegi azamattar ǵana emes, sondaı-aq sheteldikter de biletin bolady. Bul isti jasaýǵa arnaıy kásibı top jasaqtadyq. Bizge memleketten qoldaý ǵana qajet. Eger bul joba júzege assa, álemdegi eń birinshi Marketıng mınıstrligi bolady» dedi jas kásipker.
Elbasynyń qatysýymen ótip jatqan «Táýelsizdik urpaqtary» atty Jastar jylynyń ashylý saltanatyna elimizdiń eń belsendi, tabysty jastary qatysyp jatyr. Dál qazir respýblıkanyń barlyq aımaǵynyń jastary, onyń ishinde 115 JOO men 479 kolledj stýdentteri ınternet arqyly onlaın rejımge shyqty.
