Al, jalpy jospardaǵy 11675 adamnyń 79,6 paıyzy, demek, 8983-i jumyspen qamtýdyń belsendi sharalaryna tartylǵan. Aıta ketý kerek, bul kórsetkish boıynsha Jambyl oblysy respýblıka óńirleri arasynda ekinshi orynǵa joǵarylaǵan. Bul jóninde Jambyl oblysynyń ákimi Asqar Myrzahmetovtyń tóraǵalyǵymen ótken jıynda aıtyldy.
Jıynda oblystyq Jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Seıdahmet Seıtbekov basqarmanyń ótken jyly atqarǵan jumystary týraly esep berdi.
Onyń aıtýynsha, ótken jyldyń qorytyndysy boıynsha óńirdegi jumyssyzdyq deńgeıi 4,9 paıyzdy qurasa, al, qurylǵan turaqty jańa jumys oryndarynyń sany 5839 birlikke jetip, meje 108,8 paıyzǵa oryndalǵan.
Sondaı-aq, nátıjeli jumyspen qamtý jáne jappaı kásipkerlikti damytý baǵdarlamasy aıasynda jumyspen qamtýdyń belsendi sharalaryna barlyǵy 39243 adam tartylyp, onyń 31220-sy jumysqa ornalasqan. Onyń 21496-y turaqty, 9724-i ýaqytsha jumyspen qamtylǵan. Aıta ketý kerek, bul baǵdarlama boıynsha óńirdegi 4212 adam qysqa merzimdi kásiptik oqytýdan, 770 adam tehnıkalyq jáne kásiptik bilim berý, 1904 adam kásipkerlik negizderine oqytýdan ótken. Sonymen qatar, 1107 adamǵa mıkrokredıt berilse, 30 adamǵa grant berilgen.
Jıynda oń kórsetkishtermen qatar ózekti máseleler de talqylanyp, aǵymdaǵy jyldyń jospary da belgilendi. Ákim jıyn barysynda bıýdjet, qurylys esebinen bólek, óndiris oryndary arqyly jumysqa ornalasý deńgeıin kóterý, jastar arasyndaǵy jumyssyzdyq kórsetkishin jaqsartý kerektigin basa aıtty.
Hamıt ESAMAN,
«Egemen Qazagstan»,
Jambyl oblysy
