«Jastar jyly» arqyly elimizde alǵash ret jastarǵa júıeli túrde qoldaý kórsetýdiń keshendi sharalary qabyldanyp otyr. Osylaısha, Elbasymyz uzaqmerzimdi maqsattarymyzǵa qol jetkizýdiń jańa múmkindikterin kórsetip berdi. Sondyqtan Qazaqstan jastarǵa úlken senim arta otyryp, damýdyń kelesi jańa kezeńine qadam basty deýge ábden bolady», dedi M.Áshimbaev.
Sonymen qatar saltanatty is-sharanyń «Nur Álem» bolashaqtyń energııasy EKSPO-mýzeıinde ótýiniń sebebine toqtaldy. M.Áshimbaevtyń aıtýynsha, Táýelsiz Qazaqstanda týyp-ósken, «Bolashaq» baǵdarlamasy arqyly álemniń eń ozyq joǵary oqý oryndarynda bilim alǵan, sanasy ashyq, tyń ıdeıalarǵa baı bizdiń búgingi jastarymyz – elimiz úshin naǵyz bolashaqtyń energııasy. Bul – táýelsizdik urpaqtarynyń el damýyna naqty úles qosyp, Qazaqstandy jańa bıikterge bastaıtyn kez kelgenin bildiredi.
«Jalpy qazaq ejelden jastardyń kúsh-qýaty men áleýetine erekshe mán berip, qashanda óskeleń urpaqqa úlken senim artqan halyq. Oǵan ata-babamyzdan qalǵan «aqyl – jastan», «jas kelse iske» degen sııaqty qanatty sózder dálel. Osy turǵydan kelgende, bıylǵy «Jastar jylynyń» mańyzy zor.
Sonymen qatar qazirgi tańda búkil álemniń kúrdeli ózgeristerdi bastan keshirip jatqanyn da kórip otyrmyz. Dúnıe júzinde sıfrly qoǵam men bilim ekonomıkasyna negizdelgen jańa jahandyq órkenıet beleń alyp keledi. Sol úrdisterge saı bolýymyz úshin de jastarǵa jaǵdaı jasaýdyń bereri mol», dedi M.Áshimbaev.
Budan keıin «Nur Otan» partııasy Tóraǵasynyń Birinshi orynbasary Jastar jylynda naýqanshylyqqa boı aldyrmaı, naqty isterge jol berý qajettigine nazar aýdardy.
«Elbasy atqarar jumystarymyzdyń baǵyt-baǵdaryn baǵamdap berdi. Atap aıtqanda, Elbasy qazaqstandyq jumysshy jastardyń baspanaly bolýyn qamtamasyz etý úshin elimizdiń úsh megapolısinde jaldamaly baspana arqyly beriletin turǵyn úıler salýdy tapsyrdy.
Odan bólek, jastardy jumyspen qamtý máselesinde de jańa bastamalar qolǵa alynbaq. Sonyń ishinde jastardyń kásipkerlikpen aınalysýyna qoldaý kórsetetin «Jas kásipker» jobasyn aıryqsha atap ótken jón. «Dıplommen – aýylǵa» baǵdarlamasyna engiziletin mamandyqtar tiziminiń keńeıýi men tólenetin járdemaqynyń kóbeıýi de aýyl jastaryna kórsetilgen úlken qoldaý ekeni sózsiz», dedi M.Áshimbaev.
Sondaı-aq Elbasy jastardyń sapaly bilim alýyn qamtamasyz etýge de erekshe kóńil bólgenin atap ótip, jas ǵalymdarǵa beriletin granttardy kóbeıtý, qashyqtyqtan oqytý, jastardyń durys mamandyq tańdaýyna yqpal etetin «Jas maman» jobasyn júzege asyrý, qoǵamnyń damýyna óz úlesin qosyp júrgen erikti stýdentterdiń stıpendııasyn ósirý sııaqty naqty tapsyrmalar Qazaqstan jastaryna berilip otyrǵan mol múmkindik ekenin jetkizdi.
«Memleket basshysy qorshaǵan ortany qorǵaý jáne elimizdiń ekojúıesi men týrızmdi damytý máselesindegi jastardyń rólin de nazardan tys qaldyrmady. Olardyń áskerı-patrıottyq tárbıesi men otbasylyq qundylyqtardyń saqtalýy da Elbasy toqtalǵan ózekti máselelerdiń biri boldy. Munyń barlyǵy álemde bolyp jatqan úrdister men ózgeristerden týyndap otyrǵan qajettilikter. О́ıtkeni dál qazirgi kezeńde táýelsizdiktiń tuǵyryn nyǵaıtyp, elimizdiń básekege qabilettiligin arttyrýdyń birden bir joly jastardyń áleýetin tıimdi paıdalaný jáne olarǵa laıyqty jaǵdaı jasaý. Sondyqtan Elbasy aıtqan tyń bastamalar eldigimizdiń irgesin odan ári bekitip, táýelsizdigimizdi kúsheıtý jolyndaǵy ıgi isterge tyń serpin beredi dep senemiz.
Memleket basshysy osy isterdiń sapaly ári ýaqytyly oryndalýyn «Nur Otan» partııasyna tapsyryp, barsha nurotandyqtar men partııamyzdyń «Jas Otan» jastar qanatyna úlken senim artyp otyr. Sondyqtan biz Memleket basshysynyń «Jastar jylyna» qatysty barlyq tapsyrmalarynyń sapaly oryndalýyn qamtamasyz etip, eldik múdde jolyndaǵy ıgilikti iske óz úlesimizdi qosatyn bolamyz», dedi M.Áshimbaev.
