Onyń aıtýynsha, Memleket basshysynyń tapsyrmasyna sáıkes 2016 jyldan bastap joǵary bilim alýǵa qoljetimdilikti arttyrýǵa baılanysty josparly jumystar júrgizilýde. Atalǵan jumystardyń nátıjesi osy jyldan bastap UBT-ny jylyna 4 ret, ıaǵnı qańtar, naýryz, maýsym jáne tamyz aılarynda tapsyrý múmkindigi bolyp otyr.
«Qańtar, naýryz jáne tamyz aılarynda ótken UBT-ǵa qatysý mektep bitirýshi túlektiń joǵary oqý ornynda tek aqyly bólimge túsýine quqyq beredi. Eger mektep bitirýshi túlek memlekettik bilim grantyn alǵysy kelse, mindetti túrde maýsym aıynda ótkiziletin UBT-ǵa qatysýy kerek. Maýsym aıynda tapsyrǵan UBT-nyń qorytyndysy boıynsha bilim berý grantyn berý konkýrsyna qatysa alady. Bul is-sharalardyń uıymdastyrylýyna memlekettik qarjydan birde-bir tıynnyń jumsalmaıtynyn aıta ketýimiz kerek», dedi R.Álimqulov.
Jalpy, UBT ótkizý pýnktteriniń sany – 74, ótinishter sany – 35 838 adam, onyń ishinde 25 615 adam qazaq tilinde, 10 162 adam orys tilinde, 61 adam testileýdi aǵylshyn tilinde tapsyrýǵa ótinish bildirgen. Qatysýshylar sanaty boıynsha 29 789 adam – 11-synyp oqýshylary, 3 268 adam – shartty túrde túskender, 2 781 adam – shyǵarmashylyq mamandyqtarynan basqa mamandyqtarǵa aýysýshylar. Qysqy testileýge 34 687 adam qatysqan. Múmkindigi shekteýli jandar – 9. UBT-nyń shekti deńgeıinen ótkender – 24 012 adam (69%), shekti deńgeıden óte almaǵandar – 10 675 adam (31%).
Al beıindi pánder kombınasııasy boıynsha «Matematıka-fızıkany»
8 430 (28,8%), «Hımııa-bıologııany» – 5 839 (19,9%) túsýshi tańdaǵan.
UBT testileriniń mazmunyna qatysty Respýblıkalyq apellıasııa komıssııasyna 8 ótinish kelip túsken, onyń 3-i qanaǵattandyrylǵan. О́tken jyly test tapsyrmalarynyń mazmuny boıynsha 243 ótinish túskenin, onyń ishinde 101-i qanaǵattandyrylǵanyn atap ótý kerek.
Raýan QAIDAR,
«Egemen Qazaqstan»
