Kúni keshe ǵana Jetisýdyń jaýharyna balanatyn «Shymbulaq» pen Reseıdiń «Roza Hýtor» taý kýrorttary ózara yntymaqtastyq kelisimge keldi. Bul Reseı men Qazaqstannyń týrızm salasyndaǵy baılanysyn nyǵaıtyp, eki el arasyndaǵy dostyq qatynastardyń beriktigin arttyra túsedi. Atalǵan memorandým kýrorttardyń tanymaldyǵyn arttyrý, taý týrızmin damytý, belsendi demalys, sportpen shuǵyldaný jáne salaýatty ómir saltyn nasıhattaý maqsatyndaǵy ózara is-qımyldardy kózdep otyr.
«Bizdi post-keńestik keńistiktegi eń úzdik taý kýrorttarynyń birimen yntymaqtastyqtyń osyndaı formaty erekshe qyzyqtyrdy. Mundaı sınergııa qonaqtarymyzdyń sheńberin keńeıtýge qabiletti jáne qazir biz Qazaqstan men Reseıdiń týrıstik naryqtaryn jańadan ashý ústindemiz. Bizde bir-birimizge usyna alatyn dúnıe kóp, osy tańda ózara tıimdi qatynastardy damytýǵa yqpal etetin naqty marketıngtik sheshimder belgilendi»,- deıdi «Roza Hýtor» taý kýrortynyń bas dırektory Sergeı Bachın.
Eki jaqty kelisimge sáıkes, qazaqstandyq jáne reseılik taý kýrorttarynyń ákimshiligi týrızm jáne mádenı-saýyqtyrý demalysy, konferensııalar, semınarlar jáne basqa da is-sharalar men birlesken jobalardy iske asyrý úshin barlyq qoljetimdi tetikterdi paıdalanatyn bolady. Bul rette ózara aqparattyq, bilim berý, ádistemelik jáne konsýltasııalyq qoldaý kórsetý josparlanýda. Mundaı qyzmettiń mańyzdy tarmaǵy – statıstıkalyq, anyqtamalyq málimettermen jáne basqa da derektermen almasý. Mamandar, bul qadam shańǵy kýrorttaryna kórshi elderdiń taý shańǵysy, taý, sporttyq týrızm erekshelikterin jaqsyraq túsinýge múmkindik beretinin, sondaı-aq bolashaqta qazaqstandyq belsendi demalys áýesqoılary arasynda «Roza Hýtordyń», reseılikter arasynda «Shymbulaqtyń» tanymaldylyǵyn arttyratynyn aıtady. Qos tarap áleýetti týrısterdiń qalaýy men suranystaryn zerdeleý arqyly seriktes-kýrorttarǵa qazaqstandyqtardy, reseılikterdi jáne basqa memleketterdiń ókilderin tartý strategııasyn ázirleýge kúsh salatyndaryn aıtyp otyr.
– Qazaqstandyq jáne reseılik kýrorttardyń ózara tanymaldylyǵyn arttyrýǵa birlesken jeńildik baǵdarlamalary yqpal etedi dep úmittenemiz jáne olardyń áreketi «Shymbulaqtyń» jáne «Roza Hýtordyń» da qonaqtaryna qoldanylady. Mysaly, osyndaı naýqandardyń sheńberinde kýrorttardyń birinde aptalyq skı-pass satyp alatyn týrıster osy kýrortta nemese onyń ákimshiligi usynǵan qonaq úılerdiń birinde ornalasqan qonaq úıde turǵan jaǵdaıda seriktes kýrorttan tegin bir aptalyq skı-passty alý quqyǵyna ıe bolady, – deıdi «Shymbulaq» taý kýrortynyń bas dırektory Erjan Erkinbaev.
Jańa bastamada erekshe oqıǵalar men kúnderge, ásirese seriktes-kýrort kúnine oraılastyrylǵan arnaıy merekeler ótkizý jobasy qolǵa alynǵan. Mundaı kúnderi «Roza Hýtorda» demalatyn týrıster «Shymbulaqqa» arnalǵan fotokórmelerdi, shyǵarmashylyq ujymdardyń konsertterin tamashalap, qazaqtyń ulttyq taǵamdarynan dám tata alady. О́z kezeginde Ile Alataýyndaǵy eń tanymal taý kýrortynyń qonaqtary da Sochıdegi olımpıada murasynyń eń iri nysany atanǵan Reseı kýrortynyń taqyryptyq kúnderine qatysýǵa múmkindigi bar. Osynyń barlyǵy kórshiles elderdiń týrıstik baǵyttar retinde tanylýyna yqpal etpek.
Arman OKTIаBR,
«Egemen Qazaqstan»
ALMATY
