Shara aıasynda kez kelgen turǵyn ózin mazalaǵan jaıt týraly nemese usynys-pikirlerin tikeleı mekeme basshysymen kezdesýde talqylaı alady. Jylyoı aýdanyna jumys sapary barysynda áleýmettik máseleler jóninde kóshpeli otyrys ótkizgen oblys ákimi Nurlan Noǵaev osyndaı tapsyrma berdi. Osylaısha halyqpen keri baılanys ornatýdyń jańa kezeńi júzege aspaq.
- Azamattardy jeke suraqtarymen qabyldaǵan kezde bizge mektep, balabaqsha dırektorlarynyń jumysyna, medısınalyq mekemelerdiń qyzmetine shaǵymdanyp jatady. Turǵyndar máselelerin basshylarmen tikeleı sheshe almaıdy. Bulaı bolmaýy kerek. Memleket basshysynyń halyqpen keri baılanys mehanızmin jolǵa qoıý týraly tapsyrmasy bary barshańyzǵa belgili,- dep atap ótti Nurlan Noǵaev.
О́ńirde memlekettik organdardyń basshylary, barlyq deńgeıdegi ákimder brıfıngterge qatysady, telearnalarda tikeleı efır arqyly turǵyndardyń saýaldaryna jaýap beredi. Endi aqpan aıynan bastap áleýmettik jelilerdi de osy maqsatqa paıdalaný kózdelip otyr.
- Atyraý oblysy ákiminiń tapsyrmasy boıynsha memlekettik organdardyń basshylary áleýmettik jelilerdegi Atyraý oblysy ákimdiginiń resmı paraqshalarynda tikeleı efır arqyly apta saıyn esep beretin bolady. Bul - ýaqyt talaby. Oblys turǵyndary Facebook nemese Instagram jelileri arqyly úılerinen shyqpaı-aq tikeleı baılanyspen suraqtaryn qoıa alady, - deıdi oblys ákiminiń baspasóz hatshysy Serikjan Ermentaev. - Memlekettik organ basshylary Live rejımde barlyq suraqtarǵa jaýap beredi, áleýmettik jelilerdiń bir artyqshylyǵy, spıkerler efır ýaqytyna táýeldi emes.
Sonymen qatar, aımaqta Telegram qosymshasynda chat-kanal jumys isteıdi. 7 myńnan astam adam tirkelgen «Atyraý Sıfrlyq Qabyldaý» mobıldi qosymshasy da bar. Bılik pen buqara arasynda tyǵyz baılanys ornatýdy maqsat etken bastama baıandy bolsa ıgi.
Baqytgúl BABASh,
«Egemen Qazaqstan»
ATYRAÝ
