«Ulttyq qurama Almaty oblysynda jattyǵý jıynynda ótkizip jatyr. Bul bizdiń sportshylar úshin kópten kútken jıyn bolatyn. Sebebi, bizde mundaı sharalar jıi uıymdastyryla bermeıdi. Iá, jańa jylmen birge jańa maýsym da bastaldy. Bul maýsymnyń biz úshin ońaı bolmasy anyq. О́ıtkeni, alda Olımpıada oıyndary kele jatyr», - deıdi Olga Dovgýn.
Bas bapker 2020 jylǵy Tokıo oıyndaryna joldama qalaı taratylatynyn túsindirdi.
«Mergender Olımpıada joldamasyn álem kýbogi kezeńderi men Azııa chempıonatynda sarapqa salady. Atap aıtar bolsaq, bizdiń sportshylardy tórt birdeı álem kýbogi kezeńi kútip tur. Álemdik dodada ár jattyǵý túrinen eki olımpıadalyq kvota beriledi. Eger 1-2 oryndaǵy sportshylar joldamaǵa ıelik etken bolsa, kvota 3-4 satydaǵy mergenderge ótedi. Al Azııa chempıonatynda ár jattyǵýdan tórt kvota taratylatyny anyqtaldy», - deıdi bas bapker.
Olga Dovgýn mergender aldynda qandaı talap baryn da jasyrmady. Bas bapkerdiń aıtýynsha, komanda múshelerine 3 joldama jeńip alý tapsyrylǵan.
«Olımpıadaǵa úsh joldama ıelensek degen maqsat qoıdyq. Sol sebepti, jyldyń basty jarystaryna negizgi quram sportshylaryn aparamyz. Árıne, bul jastar shet qalady degen sóz emes. Talantty jas mergenderdi de qatarǵa qosamyz», - deıdi ol.
Nysana kózdeýden Qazaqstan ulttyq quramasynyń bıylǵy maýsymdaǵy alǵashqy resmı týrnıri Úndistanda ótedi.
