Qazaqstandyq jelini 12 jáne 14 jastaǵy Amına men Alılıa oılap tapty. Nursultan Nazarbaev jastardyń ónertabysyna oń baǵasyn berdi.
«Bári tamasha ótti. Elbasy bizdi maqtap-madaqtap, mundaı platformanyń búgingi jastarǵa berer paıdasy mol ekenin aıtty. Sonymen birge Qazaqstan Prezıdenti bizdiń aldymyzda áli talaı múmkindikter ashylatynyn tilge tıek etip, sol múmkindikterdi qalt jiberip almaý qajet dep aqyl-keńes berdi. Jáne biz oılap tapqan áleýmettik jelini ári qaraı damytý kerektigin sóz etti», - deıdi Next Generation jobasynyń avtory Amına Naryqbaeva.
Generation Next dep atalatyn portal - bul áleýmettik jeliniń jańartylǵan túri. Dálirek aıtqanda, saıt ózine birneshe ınternet-resýrstardy biriktirgen. Munda ǵalamtor paıdalanýshylary bir-birimen tanysyp, áńgimelesip qana qoımaı, sonymen birge san túrli taqyrypta jańalyqtar oqyp, psıhologtyń aqyl-keńesine júgine alady.
«Biz bul jobany eki aı boıy ázirledik. Aldaǵy eki apta ishinde ony testileýden ótkizemiz. Tek sodan keıin ǵana portaldyń siltemesimen bólisýdi josparlap otyrmyz», - deıdi Next Generation jobasynyń jetekshisi Gúlnár Arystanova.
Jasóspirimderdiń jobasy ata-analar tarapynan qoldaý tapqan. Next Generation ıdeıasy Alılıa men Amınaniki bolsa, qarjylyq kómekti áke-sheshesi kórsetken eken.
«Mynaý bizdiń komanda. Biz qyzyqty tulǵalardan suhbat alyp, ózimizdiń kontentimizdi quramyz. Mysaly, akterlermen, vaınerlermen, sondaı-aq ǵalymdarmen kezdesip, olarmen tildestik. Jalpy bizdiń saıtqa tirkelgen qoldanýshy tek shynaıy ári paıdaly aqparatpen bólisýge kelisimin beredi», - deıdi Next Generation jobasynyń avtory Alılıa Naryqbaeva.
Bul eki qyzdyń bastamasy Elbasynyń kóńilinen shyqty. Jobanyń sátti iske asýy úshin Prezıdent Úkimetke osy isti erekshe baqylaýǵa alýdy tapsyrdy.
