«Bul is-sharany ótkizýdegi basty maqsatymyz – Elbasy N.Á.Nazarbaevtyń «Uly dalanyń jeti qyry» maqalasynda kóterilgen túrki áleminiń genezısi, uly dalanyń uly esimderi, dala órkenıeti, ulttyq biregeılik syndy ulttyq-rýhanı turǵysyndaǵy mańyzdy máseleler talqylaý. Maqalada aıtylǵan qundylyqtardy qazirgi qoǵam sanasyna ońtaıly sińirý, jas urpaq tálim-tárbıesi ózegine aınaldyrýdyń utymdy joldaryn zerdeleý», dedi jıynǵa moderatorlyq etken Astana qalasy ákimdigi «Rýhanııat» kommýnaldyq memlekettik mekemesiniń basshysy Erjan Eńsebaı.
Jıynda sóz alǵan Astana qalasy Oqýshylar saraıynyń dırektory, Qazaqstan Respýblıkasy Bilim berý isiniń qurmetti qyzmetkeri Erbol Irgebaı Uly dalanyń uly tulǵalaryn jas urpaqqa nasıhattaý tóńireginde oı qozǵap, oqýshylar saraıynda jasalyp jatqan jumystarǵa toqtalsa, Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń atqarýshy dırektory, fılologııa ǵylymdarynyń kandıdaty Erbol Tileshov Ulttyq biregeılikti saqtaýdaǵy álipbı mańyzy týraly aıtty. «Keshe ǵana «Egemen Qazaqstan» gazetinde ulttyq komıssııa maquldaǵan «jańa álipbı negizindegi qazaq tili emlesiniń erejeleri» jaryq kórdi. Endi osy nusqany qoldana berýge bolady. Buıyrsa, kóktemde Qazaqstan Respýblıkasynyń Til týraly zańyna ózgerister men tolyqtyrýlar enedi, sol kezde arnaıy qaýlymen nemese jarlyqpen bekitiletin bolady», dedi.
Budan ózge L.N.Gýmılev atyndaǵy Eýrazııa ulttyq ýnıversıtetiniń professory, tarıh ǵylymdarynyń doktory, jazýshy Tursynhan Zákenuly «Túrki áleminiń genezısi Qytaı derekterinde» atty baıandama jasasa, tarıh ǵylymdarynyń doktory Marat Ábsemetov «Alash arystarynyń murasy jáne muraǵat isi», Qazaq ulttyq óner ýnıversıtetiniń professory, Qazaqstannyń eńbek sińirgen qaıratkeri, ónertanýshy, kúıshi Janǵalı Júzbaı «Uly dala folklorynyń myńjyldyq murasy: otandyq ónertaný ǵylymynyń maqsaty men mindeti» taqyrybynda baıandama jasady. L.N.Gýmılev atyndaǵy EUÝ Eýrazııalyq zertteýler kafedrasynyń professory, tarıh ǵylymdarynyń doktory Maqsat Alpysbes «Shejire jáne Uly dalanyń uly esimderi» jaıynda, argymaq.kz ulttyq tanymdyq portalynyń bas redaktory Erjan Jaýbaı «Uly dala jáne atqa miný mádenıeti» taqyrybynda baıandady.
Is-sharaǵa zııaly qaýym ókilderi, Astana qalasy bilim berý mekemeleriniń basshylary men ustazdary, jas ǵalymdar men qalamgerler, rýhanııat jáne mádenıet salasynyń ókilderi, qoǵam belsendileri qatysty.
Ularbek NURǴALYMULY,
«Egemen Qazaqstan»
