Birinshi raýndtan soń, 19 jastaǵy jerlesimiz 96,5 metrdi baǵyndyryp, birinshi orynda turdy. Al fınaldyq básekede Sergeı 94,5 metrge deıin «ushyp», 248,9 upaımen úzdik úshtikti tuıyqtady. Altyn júlde 252,1 upaı jınaǵan norvegııalyq Tomas Markengtiń, kúmis júlde germanııalyq Lýka Rottyń enshisinde. Fınalda nemis sportshysy 97,5 metrdi baǵyndyrǵanymen, Markengtiń alǵashqy aınalymda jıǵan upaıy kómekke keldi.
Qazaqstan komandasynyń bas bapkeri Pavel Vasılevtiń aıtýynsha, bul tarıhı jeńiske para-par júlde.
«Táýelsiz Qazaqstan tarıhynda tuńǵysh ret biz jasóspirimder arasyndaǵy álem chempıonatynan júlde alyp otyrmyz. Árıne, bul biz úshin úlken jetistik. Jarysqa Nıkıta Devıatkın, Gleb Safonov, Nurshat Tursynjanovtar da qatysty. Bıyl biz alǵash ret kvotalar sanyn kóbeıtip, qatysýshy sportshylar sanyn tórtke jetkizdik. Buryn bizdiń el atynan eki sportshydan artyq qatyspaıtyn. Sondaı-aq, biz alǵash ret komandalyq týrnırde baq synaımyz. Álem boıynsha 12 komanda ǵana qatysatyn týrnırdiń fınalyna óttik. Bul da tarıhta birinshi ret bolyp otyrǵan jaǵdaı», - deıdi bas bapker.
«Qazirgi qýanyshymda shek joq. Elimizdiń baıraǵyn álemdik synda kótergenim úshin erekshe baqyttymyn», - deıdi Sergeı Tkachenko.
