«О́tken túnde Jánibek aýdanynda qar qursaýynan 4 kólik pen 23 adam qutqaryldy» dep habarlady Batys Qazaqstan oblystyq Tótenshe jaǵdaılar departamenti baspasóz qyzmeti.
Osynyń aldynda ǵana BQO TJ departamenti óńir turǵyndarynyń uıaly telefonyna qaýipti aýa-raıyna baılanysty oblys aýmaǵyndaǵy birqatar avtojoldarda kólik qozǵalysy jabylǵanyn habarlaǵan bolatyn. Bul jyl basynan beri TJ taratqan 56 sms-habarlama eken.
«О́kinishke qaraı avtokólik ıeleri qutqarýshylardyń eskertýine qulaq aspaıdy. Sóıtip jol boıynda túrli qıyndyqqa ushyraıdy» dep narazy bolady tótenshelikter.
Biraq ómirde neshe túrli oqıǵa kezdesedi. Qystyń kózi qyraýda adamdar erikkennen jolǵa shyǵyp, táýekelge bas tikpeıdi ǵoı. Keıinge qaldyrýǵa, úıde jatýǵa kelmeıtin jáıtter bolady.
24 qańtar kúni 16.30 men 23.45 aralyǵynda Aqoba-Jánibek aýyldary arasynan 2 jeńil avtokólik, 2 «ÝAZ»-dy tótenshelikter qutqardy. Aıta keteıik, bıylǵy qystyń, qalyń qardyń qıyndyǵyn osy jánibektikter kórip-aq jatyr. Eki kúnniń birinde soqqan boran eldimekender arasyndaǵy joldardy jıi jaýyp, qarym-qatynasqa kedergi kelýde. Bul aýdanǵa jol tazalaýǵa kómektesý úshin Oraldan birneshe arnaıy tehnıka, qýatty traktorlar jiberilgen.
25 qańtarǵa qaraǵan tún ortasynda «Jympıty-Aqsaı» jolynyń 10 shaqyrymynda kúre joldan taıyp, jıektegi qarǵa batyp qalǵan kólikti de Syrym aýdanyndaǵy №12 órt sóndirý bólimi men tótenshe jaǵdaı bólimi qyzmetkerleri qutqaryp alǵan. Bir táýiri, qutqarylǵan azamattardyń eshqaısysy da dárigerlik kómekke muqtaj emes.
Jyl basynan beri Batys Qazaqstan oblysynda tótenshelikter jol boıynda 184 kólik pen 201 adamdy qutqarǵan.
Qazbek QUTTYMURATULY,
«Egemen Qazaqstan»
Batys Qazaqstan
