Atap aıtqanda, endi kólik júrgizýshileri Almaty qalasynan Qapshaǵaı qalasyna deıingi 42 shaqyrym joldy júrip ótkeni úshin 200 teńge kóleminde aqy tóleıtin boldy. Bul soma aqshany tólemaqy qabyldaý júıesine qolma qol tólegen kezdegi baǵa, al tólemaqyny aldyn ala tóleý arqyly júzege asyrǵan jaǵdaıda jol quny – 100 teńge.
Dál osyndaı ádis Almaty qalasy men «Qorǵas» shekara mańy ntyymaqtastyq ortalyǵy aýmaǵyna deıingi kólik dálizine de qoldanylady. Kólik ıesi Qorǵasqa deıingi 295 shaqyrym joldy júrip ótkeni 600 teńgeni qolma qol tóleýi tıis Al aqyly jol úshin alynatyn qundy aldyn ala tólep qoıǵan jaǵdaıda ol eki arzanǵa túsip, 300 teńgeni quraıdy.
- Tólem qabyldaý júıeleriniń jetildirilýi adamdarǵa qolaıly jaǵdaı jasaýǵa múmkindik berip otyr. Ári bul júrgizýshilerdiń qarjysyn únemdeýge de qolaıly. Mysalǵa, Qapshaǵaıǵa deıingi jolaqy quny qolma qol tólegen kezde 200 teńgeni qurady. Al Qorǵas baǵytyndaǵy júris aqysy – 600 teńge. Baǵany Úkimet bekitti. Biraq, «Qazavtojol» ulttyq kompanııasy turǵyndarǵa yńǵaıly bolý úshin bul baǵany arzan tóleýdiń jolyn usynady. Ol úshin eki araǵa jıi qatynaıtyn kólik ıesi kez kelgen tólem termınaldarynan «Qazavtojol» ulttyq kompanııasynyń shotyna kóliktiń memlekettik tirkeý nómirin kórsetý arqyly belgili mólsherde aqsha aýdaryp qoıýy kerek. Ári mundaı jaǵdaıda tóleý qabyldaý beketinde aıaldap, tekserýden ótýdiń de qajeti bolmaıdy. Bekettegi arnaıy beınebaqylaý qurylǵysy kólik nómirin avtomatty túrde tanyp, mashınanyń kedergisiz ótýine múmkindik beredi, - dedi máselege oraı túsinik bergen «Qazavtojol» ulttyq kompanııasy Almaty oblystyq fılıaly dırektorynyń orynbasary Máýlen Álipov.
Sondaı-aq, «Qazavtojol» kompanııasynyń aldyn ala tólem qabyldaý júıesine termınaldardan bólek, ınternetbankıng arqyly da aqsha aýdarýǵa bolady. Jáne beketterde qolma qol aqsha tóleýmen birge smartfonnyń kómegine júginip, jol jurý qunyn óteýge múmkindik bar. Bul jerde biz aıtqan jol quny tek jeńil avtomobılderge arnalǵan baǵa, al júk kólikteri úshin tarıf basqasha esepteledi eken. Qazir Almaty – Qorǵas tas jolynyń aıaqtalar tusyna da tólem qabyldaý beketi salynyp, qoldanysqa berildi. Bul eki baǵyttaǵy kólikterdiń júrip ótken qashyqtyǵyn ólshep, aqyly jol aımaǵyn qoldanǵany úshin tólenetin baǵany eseptep shyǵarýǵa múmkindik beredi.
- Al Qapshaǵaıǵa deıingi joldy paıdalaný qunyn júrgizýshiler Almaty qalasyna kireberiste qoıylǵan bekette tóleıdi. Kólikterdiń qansha qashyqtyqty júrip ótkenin jol boıyndaǵy beınekamera tirkep, eseptep shyǵarady. Bolashaqta aqyly jol Taldyqorǵan qalasyna deıin uzartylyp, oblys ortalyǵy mańyna tólem qabyldaý beketi salynady, - deıdi «Qazavtojol» kompanııasynyń ókili.
Dál osy jerde «Aqyly jol aýmaǵynda qonystanǵan eldi mekenderdiń turǵyndary ishki qatynas úshin aqy tóleýge májbúr bola ma?» degen saýal týady. «Qazavtojol» mekemesiniń ókili bul máseleniń sheshilgenin aıtady.
- Aqyly jol aýmaǵynyń turǵyndary úshin bir jyldyq tólem kartasyn usynyp otyrmyz. Munyń quny 1000 teńge shamasynda. Kartaǵa kólik týraly málimet engiziledi. Sol arqyly aqyly jol aýmaǵynda kedergisiz júrip-turýǵa bolady. Al qoǵamdyq kólikterge, avtobýs pen «Jedel járdem» mashınalaryna bul jolda júrý tegin, - dedi Máýlen Álipov.
Jalpy, Almaty mańyndaǵy avtobandardyń qyzmetin aqyly baǵytqa kóshirý úshin 1 mlrd 300 mıllıon teńge memleket qarjysy jumsalǵan. Jol mamandary bul qarjy az ýaqyt aralyǵynda ótelip, aqyly joldan túsken qarjy kólik dáliziniń sapasyn jaqsartýǵa baǵyttalatynyn aıtady.
Aıtpaqshy, aqyly jol júıesi búginde álem boıynsha keń qoldanysqa enip, túsken qarajat el ekonomıkasyn arttyrýǵa jumsalady. Mysalǵa, Eýropada jaz mezgilindegi jol júrý kartasynyń quny, salmaǵy 3,5 tonnaǵa deıingi kólikter úshin 88 eýro shamasynda eken. Al Qazaqstanda bul júıe alǵash 2013 jyly qoldanylyp, Astana – Shortandy baǵytyndaǵy tas jol aqyl qyzmet kórsete bastady. Búgin Almaty – Qapshaǵaı – Qorǵas baǵytyndaǵy joldan bólek, Astana – Temirtaý baǵyty da iske qosyldy. Iаǵnı, elimizdegi aqyly joldyń uzyndyǵy 471 shaqyrymǵa sozyldy. Boljam boıynsha, 2020 jylǵa deıin taǵy 6,6 myń shaqyrymdyq respýblıkalyq mańyzdaǵy jol aqyly qyzmet kórsetýge kóshedi.
Qalmahanbet MUQAMETQALI,
«Egemen Qazaqstan»
Almaty oblysy
