Halyqaralyq kórmeni ótkizý týraly kelisimge PATA (Pacific Asia Travel Association) prezıdenti, doktor Marıo Hardı men «Kazakh Tourism» ulttyq kompanııasynyń basqarma tóraǵasy Rashıd Kúzembaev qol qoıdy.
«Biz kórmeniń PATA tarıhynda alǵashqy ret Ortalyq Azııa terrıtorııasy boıynsha Qazaqstanda ótetinine qýanyshtymyz. Azııa men Eýropanyń toǵysqan jerinde ornalasqan Qazaqstan halyqaralyq týrıstik kórmeni uıymdastyrý úshin naǵyz qolaıly el. Al, Astana Shyǵys jáne Batys mádenıeti men murasynyń ózara úılesimi kelisken erekshe qala. Sharany ótkizýdi óz jaýapkershiligine alǵan Qazaqstanmen kórmede erekshe dúnıe usynyp, birigip jumys isteýdi asyǵa kútemiz», - dedi PATA prezıdenti Marıo Hardı.
Halyqaralyq kórme QR Mádenıet jáne sport mınıstrligi men «Kazakh Tourism» AQ-nyń uıymdastyrýymen jáne Astana qalasy ákimdiginiń qoldaýymen ótedi.
«Kórme ótkizýdi Azııanyń iri qalalarynyń ishinde Astananyń jeńip alýy, onyń iskerlik jáne týrızm boıynsha statýsynyń joǵarylyǵyn dáleldeıdi. Kórmege álemniń túkpir-túkpirinen shamamen 1200 assosıasııa músheleri keledi. Negizinen basymdyq týrızm naryǵy úshin mańyzdy bolyp tabylatyn Azııa jáne Eýropa elderine beriledi. Atalǵan sharadan soń shetel týrısteriniń bizdiń elge degen qyzyǵýshylyǵynyń arta túsetinine senimdimiz», - dedi «Kazakh Tourism» ulttyq kompanııasynyń basqarma tóraǵasy Rashıd Kúzembaev.
