Babalarymyzdan qalǵan baǵlan ónerdi ulyqtaýdy murat etken sharaǵa Arqa, Altaı, Jetisý, Qarataý, Syr jáne Batys mektepteriniń kórnekti ókilderi – esimi elge keńinen tanymal Almas Almatov, Erlan Rysqalı, Jáken Omarov, Sholpan Dárjanova, Batyrjan Myqtybaev, Gúlmıra Sarına sekildi ónerpazdarmen qatar jergilikti ánshiler Ádil Turǵanbaev, Berik Omarov, Gúldana Noǵaıbaeva qatysyp, kórermenniń kóńilin bir serpiltti. Mýzyka festıvaliniń ashylý saltanatyna «Nur Otan» partııasynyń hatshysy Qanybek Jumashev Astanadan arnaıy kelip, jyly lebizin jetkizip, «Uly dalanyń kóne saryndary» jobasy elimizdiń 15 qalasynda ótip, qorytyndysy kıeli Jetisý jerinde - Taldyqorǵan qalasynda shyǵarylatynyn aıtty. Jyrshy, termeshi, kúıshiler men dástúrli ánniń dúldúlderiniń basyn qosqan óner dýmanynyń maqsat-muraty qandaı, nege Semeıden bastaldy? Bul týraly «Nur Otan» partııasy Tóraǵasynyń birinshi orynbasary Máýlen Áshimbaev óziniń feısbýk jelisindegi paraqshasynda: «Partııamyzdyń 20 jyldyǵyna oraı ótkizilip otyrǵan bul aýqymdy sharanyń Semeı jerinen bastaý alýy da tegin emes. О́ıtkeni Hakim Abaı týyp-ósken topyraqtyń qazaq ónerindegi alar orny erekshe. Elbasy óziniń «Uly dalanyń jeti qyry» atty maqalasynda tarıhı sanany jańǵyrtýdyń tıimdi tetikterin ataı kelip, bul iste dala folklory men mýzykasynyń da alar orny erekshe ekenine nazar aýdarǵan bolatyn. Osy turǵydan kelgende, qazaqtyń án, kúı, jyr, terme sııaqty asyl qundylyqtaryn keńinen dáripteıtin festıvaldiń bereri mol dep esepteımiz. Sonymen qatar osy festıval arqyly óskeleń urpaqqa rýhanı tálim berip, jastarymyzdyń boıynda patrıottyq rýh qalyptastyrýdy da kózdep otyrmyz. О́ıtkeni, ulttyq qundylyqtardan nár alyp ósken urpaqtyń osaly bolmaıdy. Keshegi «Táýelsizdiktiń urpaqtary» atty forýmda Elbasy aıtqan patrıottyq tárbıeniń bir ustyny osyndaı uly muralarymyzǵa da taban tireıtini sózsiz. Sondyqtan jarty jylǵa jalǵasatyn jańa joba arqyly elimizdiń barlyq óńirin qamtýdy josparlap otyrmyz. Soǵan baılanysty atalǵan festıval aldaǵy aqpan aıynda Pavlodar men Soltústik Qazaqstan oblystarynda uıymdastyrylmaq» dep jazǵan bolatyn.
Joba prodıýsseri Bazarbek Atyǵaımen pikirleskenimizde Semeıdegi konsert joǵary deńgeıde ótkenin jetkizdi. «Keshti halyq óte keremet qabyldady. Jáken Omarov Qarataýdyń, Syr boıynyń Maılyqoja, Qulynshaq, Mádeliqoja sekildi jyrshy-termeshileriniń rýhanı-adamgershilikti nasıhattaıtyn termelerin oryndady. Kómeımen jyr aıtý mektebiniń úzdik ókili Almas Almatov sharany leksııa-konsert formatynda júrgizip otyrdy. Qurmanǵazy, Dına, Dáýletkereı, Seıtek bastaǵan Batys kúıshilik mektebiniń ókili Batyrjan Myqtybaev, Jambyl, Súıinbaıdan bastaý alyp, Kenenge jalǵasqan Jetisý ánshilik-jyrshylyq mektebiniń ókili Sholpan Dárjanova men Altaı-Arqa mektebiniń ókili Erlan Rysqalı bir jarym saǵat boıy kórermenderge esten ketpes erekshe kesh syılady. Barlyq mektepterdi qamtýǵa tyrystyq. Jergilikti ánshilerdi de qostyq. Jalpy, mundaı joba keıbir oblystarda kópten beri qolǵa alynbaǵan eken. Máselen, soltústikte sońǵy 10 jyl muǵdarynda ótpepti. Semeı halqy qatty rıza boldy. Jáken Omarov pen Sholpan Dárjanova, basqa da ónerpazdar Semeıdiń halqyna rıza boldy. «Zııaly, talǵamy bıik aýdıtorııa eken» dep baǵalaryn berip jatyr», - deıdi ol.
Al dástúrli ánshi Erlan Rysqalı dástúrli mýzyka festıvali kórermenniń ǵana emes, ulttyq ónerdi ulyqtap júrgen ónerpazdardyń eńsesin kóterip tastaǵanyn tilge tıek etti. «Elimizdiń bas partııasy - "Nur Otannyń" ulttyq ónerdi ulyqtap jatqany qýantady. Semeıde konsert kórýge kelgen elde esep joq. Zal lyq toly boldy. Halyq sýsap qalypty. О́z ónerin ábden saǵynǵan eken. Árbir ónerpazǵa degen yqylas-qurmeti tipti erekshe boldy. Tekti atanyń urpaǵy tekti ónerimen qaýyshty. Tekti óner tuǵyrynan túspesin», - deıdi ánshi.
Azamat QASYM,
«Egemen Qazaqstan»
SEMEI
