Oblysymyzdyń basqa óńirlerden ereksheligi, «Serpin» baǵdarlamasymen kelip oqyp jatqan jastar bar. Olar osynda turaqtap qalýy úshin turǵyn úı berý máselesin kóterip júrmiz. Aýdan-qala ákimderine hat ta jazyldy. Jas mamandar barǵysy kelse de, keıbir aýdandarda olar turatyn úı joq. Bul túıtkilder endi sheshimin tabady dep oılaımyz.
Eriktiler jumysy bizdiń oblysta burynnan jaqsy jolǵa qoıylǵan. Qarttar úıine, Balalar úıine, Analar úıine jıi baryp turamyz. «Úmit» balalar úıi turaqty túrde qamqorlyqqa alynǵan. Bizdiń eriktilerimiz halyqaralyq EKSPO kórmesine de atsalysty. Bes jyl buryn Qazan qalasynda ótken ýnıversıadada óńirdiń eriktileri tórt memlekettiń arasynda úzdik atanǵan bolatyn. Bul baǵyttaǵy jumystardy odan ári shıratatyn bolamyz.
Jastar jylynyń saltanatty ashylýynda Elbasynyń ózi erekshe toqtalǵan jastardyń ajyrasýy óńirimizde ózekti máselelerdiń qatarynda. Ásirese jastardyń ajyrasýy aýyldy jerlerde beleń alyp tur. Psıhologtardyń jetkiliksizdigi, áıel adamdarda syr bólisetin, sher tarqatatyn jandardyń bolmaýy, densaýlyǵyndaǵy kinárat – ajyrasýdyń kóp sebepteriniń biri. Jasyratyny joq, qazaqy mentalıtetimizge baılanysty aýyldy jerlerde áıel qaýymynyń kópshiligi dárigerdiń aldyna barýǵa yńǵaısyzdanady. Uıalady. Keıbir otbasylar bala bolmaýy sebepti ajyrasyp jatyr. Osynyń saldarynan óz-ózine qol jumsap jatqan adamdar da bar. Sondyqtan bul tarapta bizdi aýqymdy jumystar kútip tur. Osy máselemen keshendi túrde shuǵyldaný úshin arnaıy jumys tobyn quryp, aýdan-aýyldardy aralaıtyn bolamyz. Top quramyna ýnıversıtetterdiń psıholog mamandary, densaýlyq saqtaý basqarmasynyń ókilderi, bilikti dárigerler – ýrologtar, gınekologtar kiredi. Jumys toby árbir aýyldyq okrýgterge baryp, úkimettik emes uıymdarmen, sondaǵy aqsaqaldar, analar alqasymen birlese jumys isteıtin bolady. Qazir oblystyń aýdandarynda daǵdarys ortalyqtary ashylyp jatyr. Zaısan aýdanynda áıel adamdarǵa arnalǵan «Otbasynda zorlyq-zombylyqqa jol joq» degen ortalyq jumysyn bastady. Osy baǵyttaǵy jumystardy jandandyrý oıymyzda bar.
Jalpy, óńirde Jastar jylyna baılanysty birneshe baǵytty qamtıtyn úlken jumys jospary ázirlenip jatyr. Biz Jastar jylynda alaýlatyp-jalaýlatqan, urandatqan flesh-mob, forým, aksııalardan góri jeke adamdarǵa paıdasy tıetin, naqty, adrestik jumystardy qolǵa alsaq, jumyssyz júrgen jastardy qoldasaq deımiz. Máselen, byltyr oblysymyzda «Zhas project» jobasyna jastarymyz belsendi qatysty. Barlyq aýyldarǵa baryp, kezdesýler ótkizip, jeke bıznesin ashamyn degen jastarǵa qoldaý kórsettik. Jastar ortalyǵynyń mamandary olardy aýdandar men qalalardaǵy «Damý» men «Atamekenniń» fılıaldaryna qoldarynan jetektep aparýǵa daıyn. 2018 jyly «Zhas project» jobasyna óńirden 150 joba usynyp, 300 mıllıon teńge utyp aldyq. 150 jobaǵa 500 jas qatysty. 120 jas óziniń shaǵyn bıznesin ashty. Osyndaı jastarǵa paıdaly jumystar bıyl da jalǵasady.
Araılym ESIMBEKQYZY,
oblystyq Jastar resýrstyq ortalyǵynyń dırektory
О́SKEMEN
