Bul bilim oshaǵynda 180-ge jýyq bala bilim alady.Olardyń úshten biri osyndaǵy ashanadan tamaqtansa, oqys oqıǵa oryn alǵan kúni birqatary ózderin jaısyz sezinip, onyń aqyry jedel járdem shaqyrtýǵa týra kelgen.
Ata-analar ashanadaǵy tamaq sapasyz ázirlengen bolmasa ózge bir juqpaly ınfeksııa arqyly taralýy múmkin degen kúdikterin jasyrmaıdy.
«Keshke taman 6 jasar Alısamnyń dene qyzýy kóterilip, ishi aýyryp, júregi aınydy. Túnniń bir ýaǵynda jaǵdaıy aýyrlaǵannan keıin shuǵyl túrde aýrýhanaǵa jetkizildi», deıdi Anjelıka Sıkýn. Onyń aıtýynsha qyzy ashanadaǵy tamaqtan ýlanǵan tárizdi. О́ıtkeni, as qorytý júıesiniń qabynýy, baýyrynyń úlkeıýi sekildi belgiler paıda bolǵan. 28 ata-anadan shaǵym túsipti.
Alaıda asqa jaýapty «Lysenko» jeke kásipkerliginiń dırektory ata-analardyń joramalyn joqqa shyǵaryp otyr. Osy salada 12 jyl boıy jumys isteıtin bıznesmen taǵamnyń sanıtarlyq norma men talapqa saı keletinin aıtady. Taǵamdar oqýshylarǵa berilmes buryn meıirbıkemen birge tekseriletin kórinedi. Balalar tósek tartyp qalǵan kúni as mázirinde salat, balyq pen kartop ezbesi bolypty.
Valentına Frıdrıhtyń balasy da qatty syrqattanyp qalypty. Dárigerler ishek ýlanýy degen dıagnoz qoıǵan. Biraq uly ashanadan tamaq ishpepti. Sondyqtan aspazdarǵa kiná taqpaıdy.
Tipti mektep dırektory Raýshan Ramazanova da ózin jaısyz sezinip, jedel járdem shaqyrtypty. Dárigerler rotavırýstyq juqpa degen dıagnoz qoıypty. Ol da balardyń tamaqtan ýlanýyn joqqa shyǵarady. Mektep ishinde ınfeksııa bolýy múmkin deıdi.
Ýaıymdaýǵa esh negiz joq degen uıǵarymmen qalalyq qoǵamdyq densaýlyq saqtaý basqarmasy da kelisip otyr.
О́mir ESQALI,
«Egemen Qazaqstan»
Soltústik Qazaqstan oblysy
