«Qarjy mınıstrligi salyqtyq jáne kedendik ákimshilendirýdi sıfrlandyrýǵa baǵyttalǵan birqatar jobalardy iske asyryp jatyr. 2018 jyldyń qorytyndylary boıynsha, memlekettik kirister organdary 22 mıllıon qyzmet kórsetti. Onyń ishinde 20 mıllıon qyzmet elektrondy túrde júrgizildi. Memlekettik qyzmetterdi ary qaraı ońtaılandyrý jáne avtomattandyrý úshin vedomstvoaralyq komıssııa deńgeıinde jol kartalary bekitildi. Qyzmetterdiń kóbisin elektrondyq úkimet portalyna shyǵarý kózdelip otyr. Sondaı-aq jeke sektor kompanııalarymen ıntegrasııa júrgizilýde. Osy jumystyń nátıjesinde, 2025 jylǵa qaraı Qarjy mınıstrligiń qyzmetteriniń 95 paıyzy elektrondy formatta kórsetiletin bolady», - dedi Álıhan Smaıylov.
Onyń aıtýynsha, jyl saıyn bıýdjettik synyptama kodtaryn qysqartý, salyq eseptiligi nysandaryn ońtaılandyrý boıynsha jumys josparly túrde júrgizilip keledi. 2015 jyldan bastap bıýdjettik synyptama kodtarynyń sany 2,5 esege qysqardy.
«Salyq deklarasııasynyń nysandary 30 paıyzǵa ońtaılandyryldy. Salyqtardy elektrondy túrde tóleý prosesin jeńildetý bastaldy. Ol úshin salyq tóleýshiniń Biryńǵaı elektrondyq ámııan servısine kóshýi kózdeledi. Bul rette, Estonııanyń tájirıbesi qyzyq. Onda salyq tóleýshiler salyqty bir rekvızıtke tóleıdi. Sosyn, sol soma jeke tulǵalardyń barlyq salyqtary boıynsha avtomatty túrde taraıdy. Osyǵan sáıkes, Qarjy mınıstrliginiń aqparattyq júıeleri 2019 jyldyń sońyna qaraı Biryńǵaı elektrondyq ámııanǵa túsken salyq tólemderin ózderi shottar boıynsha taratady», - dedi mınıstr.
Sondaı-aq ol salyqtardy qate tóleýdiń boldyrmaý nátıjesinde tólem qujattarynyń sany qysqartylatynyn, anyqtalmaǵan tólemder men negizsiz aıyppuldar alynyp tastalatyny, ınkassalyq ókimder sany qysqartylatynyn jáne salyq tóleýshilerdiń ýaqyty únemdeletinin atap ótti.
«Elektrondyq ámııan arqyly salyqtardy tóleýdiń biryńǵaı servısine ótý úshin aqparattyq júıeni pysyqtaý jáne derekter bazasyn aktýalızasııalaý qajet. Budan basqa, bıýdjettik, banktik, salyq, keden zańnamalaryna ózgerister engizý boıynsha úlken jumys júrgizý qajet bolady», - dedi ol.
