«JasStar moments» dep at qoıyp, aıdar taqqan jıynnyń uıymdastyrylýyna Tárbıe jáne áleýmettik jumystar jónindegi departamenti muryndyq boldy.
Jastar jyly qarsańynda qolǵa alynǵan basqosýǵa jýrnalıstıka, sport, bıznes jáne taǵy da basqa salalarda tabysqa jetken tulǵalar belgili taqyryp aıasynda sóz sóılep, óz tájirıbelerimen bólisti.
– Jobanyń maqsaty – ońtústik astanadaǵy jastar kóshbasshylarymen birlese otyryp Jastar jylynda atqarylar jumystardy júıeleý, naqty jospar daıyndaý. Jurtshylyqqa tanymal, belgili bir salada jetistikke jetken tulǵalarmen kezdesý ótkizip,óskeleń urpaqtyń patrıottyq sezimderin arttyrýǵa yqpal etý. Sondaı-aq qala jastary arasynda ózara tyǵyz baılanys ornatýdy da kózdep otyrmyz, – deıdi uıymdastyrýshylar.
Atap aıtqanda shara barysynda «Stýdent – sport» taqyrybynda Sıdneı Olımpıadasynyń chempıony, Qazaqstanǵa eńbegi sińgen sport sheberi Ermahan Ibraımov pen Paralımpıada oıyndarynyń jeńimpazy, «100 jańa esim» jobasynyń jeńimpazy Serik Esmatov, «Stýdent – áleýmet» taqyrybynda «Jastar úni» qoǵamdyq birlestiginiń tóraǵasy Dáýren Babamuratov, «Stýdent – mádenıet» taqyrybynda telejúrgizýshi Gúlnaz Aýdanbaeva, «Stýdent – bıznes» taqyrybynda jas kásipker Áset Jumaqulov jáne «Stýdent – bilim» taqyrybynda «Bolashaq» qaýymdastyǵynyń Almaty qalasyndaǵy fılıalynyń tóraıymy Qymbat Ábdikerimova men Ashat Abjanov sóz sóıledi.
Taǵylymy mol, motıvasııasy zor jıynǵa sonymen qatar Almaty qalasyndaǵy 21 joǵary oqý ornynan 70 delegat, «Qazaqstan Stýdentter Alıansy» jáne «Jarasym» jastar uıymynyń músheleri qatysty.
Delegattar Qyzdar ýnıversıtetiniń bastamasymen uıymdastyrylyp otyrǵan osy taqilettes basqosýlardyń jastardyń tanym deńgeıi men sana-sezimin hám oı-órisin arttyrýǵa tıgizetin septigi zor ekendigin aıtady. Olar aldaǵy ýaqytta ýnıversıtettiń belsendi stýdentteriniń bastamasymen uıymdastyrylǵan osyndaı formattaǵy jıyndardy óz oqý ornynda da ótkizýge nıet bildirdi.
Ánmen áspettelgen forým aıasynda Qyzdar ýnıversıtetiniń jastar uıymdarynyń tóraıymdary jáne belsendileri ant qabyldady.
Aınash ESALI,
«Egemen Qazaqstan»
ALMATY
