Qalanyń kórikti nysandarynyń biri retinde boı kótergen ǵımarat mańynda stýdentterge arnalǵan sport kesheni, sondaı-aq jataqhana bar. Odan bólek qalanyń basqa shaǵyn aýdandarynda ornalasqan qos jataqhanada ýnıversıtet stýdentterimen birge qyzmetkerler de meken etken. Al kolledj stýdentteriniń atalǵan ýnıversıtet stýdentterine qyzyqqannan basqa amaly joq bolatyn.
Baǵasy ushynyp turǵan páter jaldaýdy ekiniń biriniń qaltasy kótere bermeıtin bolǵandyqtan, tyǵyryqqa tirelip abdyraǵan ata-ana men daǵdarǵan stýdent jastardy kórip júrmiz. Aýyldan kelip, qalanyń kóshpendisine aınalǵan balalardyń basyn suǵar jaıly jataǵy joq, ıaǵnı sabaǵynyń da sáni bolmasy anyq. Bul sońǵy jyldary paıda bolǵan jaǵdaı emes, kerisinshe jyldar boıyna qordalanǵan, birneshe býyn túlekterdi tentiretken, sheshimi memlekettik deńgeıde qolǵa alynbasa, ońaılyqpen oń nátıje bere qoımaıtyn máselege aınalǵan bolatyn.
Memleket basshysynyń bes áleýmettik bastamasy bul jaǵdaıǵa qozǵaý saldy. Elimizdiń túkpir-túkpirinde jataqhanamen qamtý máselesi qolǵa alynyp, jastardyń jaǵdaıyna qan júgirdi. Bastamanyń Jastar jylymen jalǵasýy da kóńilge kóp úmit uıalatady.
Aqtaý qalasynda Mańǵystaý О́ner kolledjiniń ashylǵanyna jıyrma jylǵa jýyqtap qaldy. О́lkedegi ónerge qushtar ulandardy jıyp, san túrli mamandyq boıynsha úlken álemge qanattandyryp júrgen oqý ordasynyń jetistikteri jeterlik, túlekteri de osal emes. Ár jyldary túlep ushqandardyń arasynan búginde respýblıkaǵa tanymal birqatar óner juldyzyn atap aıtýǵa bolady. Kolledj ashylǵaly beri Mańǵystaýdyń alys aýdandary men elimizdiń ózge óńirlerinen kelip oqıtyn stýdentterdiń mýzykalyq aspaptary men júkterin arqalap, jataqhana taba almaı júrýi kóz úırengen kóriniske aınalǵan. Aqtaýdaǵy ózge kolledjderdiń jataqhanalaryna jáýteńdep, oryn ózderinen aýyssa ǵana tabaldyryǵynan jasqana attaǵanyn búginde atpal azamat bolyp, eńbek etip júrgenderi jyr etip aıtyp otyrady. Ol jataqhanalardaǵy turmystyq jaǵdaıdyń máz emes ekendigi taǵy bar...
Jyldar boıy jataqhana jaıy jyr bolǵan Mańǵystaý О́ner kolledjin jaqsy jańalyq kútip tur. Elbasynyń tapsyrmalaryn júzege asyrý aıasynda Aqtaý qalasy 3 «b» shaǵyn aýdanynan jeke kásipker Sh.Gýseınovtyń kómegimen 250 oryndyq jataqhana ashylyp, stýdentter ıgiligine usynylmaq. 1993 jyly irgetasy qalanǵan ǵımarat úsh qabatty, aýmaǵy − 1956,6 sharshy metr. Zamanaýı jıhazdarmen jabdyqtalǵan ár bólme 2 jáne 6 adamǵa arnalǵan. Ár qabatta barlyq qajettiliktermen jabdyqtalǵan ashana, sondaı-aq jýynatyn bólmeler qarastyrylǵan. Birinshi qabatta stýdentter úshin demalys bólmesi, oqý zaly, kir jýatyn bólme men kıim útikteý bólmesi bar, symsyz ǵalamtor jelisi ornatylǵan.
Jalpy, aǵymdaǵy jaǵdaı boıynsha Mańǵystaýdaǵy 21244 kolledj stýdentteriniń 11086-sy aýyldyq jerdiń stýdentteri. Qazirgi tańda Qaraqııa kásiptik kolledjinde 200 oryndyq, Mańǵystaý polıtehnıkalyq kolledjinde 200 oryndyq, Mańǵystaý oblysynyń medısına kolledjinde 40 oryndyq jataqhana bar, úsh jataqhanada 394 stýdent qamtylǵan. О́ńirde áli jataqhananyń jaıyn bas aýrýyna aınaldyrǵan stýdentter azaıǵan joq. Qazirgi tańda jataqhanaǵa qajettilik 1064 oryndy quraıdy. Sondyqtan 2019 jyly úsh jataqhana paıdalanýǵa berilip, 710 stýdentke tórin usynbaq. Mańǵystaý oblystyq bilim basqarmasy basshylyǵynyń aıtýynsha, jataqhanamen qamtý isi jalǵasyn tabý arqyly 2021 jyldyń sońyna deıin barlyq stýdent jataqhanamen tolyq qamtylatyn bolady.
Jaıly jataqhanaǵa ıe bolǵan stýdentter sabaqqa tyńǵylyqty daıyndalyp, bolashaqqa tyń qadam jasaıdy dep senemiz.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
