О́tken jyly balabaqshaǵa kezekke qoıý jáne joldama berý, 1-synypqa qabyldaý, kolledjderge qabyldaý avtomattandyryldy. Osylaısha, memlekettik qyzmet kórsetý ýaqyty 3-5 kúnnen 5-10 mınýtqa deıin qysqardy.
Sonymen qatar, bul júıe turaqty jumys istemegendikten, onda derekter durys saqtalmaǵan jáne qala turǵyndarynan kóptegen shaǵymdar tústi.
«Osyǵan baılanysty, 1 aqpannan bastap júıe qala turǵyndarynyń pikiri men qoldanystaǵy zańnamany eskere otyryp, ońtaılandyrylatyn bolady. Jańartylǵan júıede kezekti qalyptastyrýdyń ashyqtyǵyn qamtamasyz etý úshin blokcheın tehnologııasy qoldanylady», - dedi Álisher Ábdiqadyrov.
Jańa júıede basym bóliginde balabaqshalardy tańdaý qarastyrylǵan, bul rette ata-analar óz tańdaýyn, onyń ishinde jeke menshik balalar uıymdarynyń paıdasyna engizý múmkindigin kórip, túzete alady.
Jumys prınsıpi belgili booking.com, uber nemese airbnb sekildi platformalardyń úlgisi boıynsha negizdelgen, bul ata-analarǵa mektepke deıingi uıymdarda kórsetiletin qosymsha qyzmetterdiń reıtıngi men keńeıtilgen tizimin eskere otyryp, balabaqshalardy tańdaýyna múmkindik beredi.
«Interfeıs jáne fýnksııalar barynsha jeńildetildi. Kelesi aılarda mektepter men kolledjderdiń fýnksıonalyn qosamyz. Sonymen qatar, reıtıng, qosymsha qyzmetter jáne basqa servıster negizinde uıymdy tańdaýǵa bolady», - dedi ol.
